 |
Questa pagina a no l'è stæta corretta. | |
Pochi Galli do Moinâ
Se porrieiva anchêu trovâ,
Ma quanti Axi interessæ,
Solo amanti di dinæ!
Quattro bestie d’ûmô differente,
Un Cavallo sûperbo e arrogante ,
Un Agnello mansûeto e paziente,
Un Bêu grosso con aja importante,
E ûn bell’Aze di ciù stramezûæ
Se trovòn fra lô insemme affammæ;
E corrindo d’in bosco in deserto,
E chinnando d’in monte in ciannûa
Comme o Lô, ma con passo ciù çerto,
Tûtti andavan çercando ventûa
Per trovâ qualche cosa addattâ
A-i so denti de poeì roziggiâ;
Stanchi e frûsti da tanto cammin,
Dä gran famme arraggiæ comme chen,
Finalmente da lonxi scrovìn
Unn-a villa in t’ûn grasso terren,
Pinn-a d’erboi, de vigna, e de biava,
C’ûn gran campo de fen ch’incantava.
