Piaggio M. - Poesie 1846/Esopo Zeneize/A Sinceritæ e a Finzion
| ←A Ræna in viaggio | Esopo Zeneize de A Sinceritæ e a Finzion |
A Vorpe morta→ |
FOA LXXI.
Oh beneita e beneixïa
Bocca averta, e mai cûxia!
Mille votte benedetta
Lengua franca, sccetta, e netta!
E beneita sempre sæ
Dov’a l’è a Sinceritæ!
Ma per bacco! i ommi anchêu
Troppo bravi a finze son,
E a conoscighe o so coêu
Ghe vêu tempo e riflescion,
Perchè ä lengua dî ghe fan
Quello che in to coêu no g’han;
Çerta razza de personn-e,
Che cattive fan da bonn-e,
Ingannando questo e quello
Son da Societæ o flagello,
E l'è ben stâne lontan
Comme sta o gatto da-o can.
Miæli in faccia questa gente,
A-o trattâ dæghe ûn pö mente,
Comme i comici san dâse
Tûtti i toin per mascherâse
Da modesti, da virtuosi,
Da sinceri, e scrupolosi,
E con quattro finti rixi
De nemixi paeìve amixi
Per ficcâvea d’arescoso!...
No bezêugna miga paeì
Galantommo, ommo virtuoso,
Ma bezêngna ëssio davveì!
L'ommo sccetto o no mentisce,
O l’è o finto chi tradisce,
E co-a vorpe sotto o brasso
O v’aspëta a quello passo
Per fâ sempre a botta çerta,...
Figgi cäi, stemmone all’erta,
Perchè chi ha l'annasto bon
I conosce dove son.
L'è de modda, o so, nö nego,
Pe ottegnî ûn favô, ûn impiego,
D’adûlâ, leccâ, incensâ
Fin magara o rûmentâ;
Tûtto sempre se gh’ accordâ,
O pêu dî che ûn aze è sghênôu,
Ch’a l’è sæa quand’a l’è corda
Ninte mai gh’è contrastôu,
Anzi pe ottegnî o so intento
Gh’è chi sa piggiâ e maschæ
Per çeimonia e complimento!..
Dov’a l’è a Sinceritæ? ...
L’ommo sccetto e vëo d’onô
Queste cose o l’ha in orrô,
Non sa finze, nè adûlâ,
Nè ste pilloe o pêu collâ.
Ma me dixe i fûrbi anchêu:
Che politica ghe vêu
Che bezêugna all’occorrenza
Ese ipocrita e impostô
E salvando l'apparenza
Preferî l’öu all’onô,
Perchè l’ommo delicôu
Chi se picca de sccettessa
O viviä, e moiä despeôu
Se o n’ha l'arte co-a finessa
De fâ o sordo , e lasciâ dî,
Basta che o posse inricchî,
Perchè a lengua no fa mâ,
E i dinæ fan rispettâ.
Taxeì, mostri interessæ,
Che a inricchî solo pensæ
E che pe ûn dinâ menûo
Appicchæ ûn ommo a ûn agûo!
Se me voeì capî, rispondo
Che per fâ fortûnn-a a-o mondo
No se deve mai servî
De bassesse, e ricorrî
A di mezi che avviliscian
L’ommo onesto, e l’abbrûtiscian,
Perchè è megio ûn nome bon,
Ch’ëse ricchi d’ûn mïon;
Che se i ommi tutti a reo
Abborrissan a Veitæ,
Cose saeiva a Societæ?
De baccan ûn bosco veo!
Senza a bonn-a fede o Mondo
O scrolliæ da cappo a fondo,
E se ûn solo Galantommo
Ghe restasse, o rinunzieiva
A-o so existe, a-o nomme d’ ommo,
E in t’ûn antro o s’ascondieiva
Per tegnî a Veitæ con lê
E portâla intatta a-o Çê,
Comme quando a n’è sciortïa.
Oh beneita e beneixïa,
Sempre diö, a Sinceritæ!
Benchè a tanti a no conven,
Perchè a fa ciû mâ che ben,
Comme a-o Figgio de mæ Poæ.
