 |
Questa pagina a no l'è stæta corretta. | |
Cose saeiva a Societæ?
De baccan ûn bosco veo!
Senza a bonn-a fede o Mondo
O scrolliæ da cappo a fondo,
E se ûn solo Galantommo
Ghe restasse, o rinunzieiva
A-o so existe, a-o nomme d’ ommo,
E in t’ûn antro o s’ascondieiva
Per tegnî a Veitæ con lê
E portâla intatta a-o Çê,
Comme quando a n’è sciortïa.
Oh beneita e beneixïa,
Sempre diö, a Sinceritæ!
Benchè a tanti a no conven,
Perchè a fa ciû mâ che ben,
Comme a-o Figgio de mæ Poæ.
FOA LXXII.
Unn-a Vorpe decrepita,
Famosa e assæ temmûa
Pe-i gren gallinicidii,
Pagò o drito ä natûa;
A so morte a fù celebre,
E tûtti i Pollastretti
Ghe fèn o fûnerale
Cacciandoghe i sûnetti;
