Piaggio M. - Poesie 1846/Esopo Zeneize/A Figgia e o Gatto
| ←O Mocchetto e o Lampion | Esopo Zeneize de A Figgia e o Gatto |
L'Avaro→ |
Un giorno ûnn-a Figgietta
Bella, ma troppo viva,
In scöso a se tegniva
Un Gattin bardo;
Che lesto sto baifardo,
E sempre pin d’axillo
Schittava comme ûn grillo
In te l’erbetta;
Aoa c’ûnn-a sampetta
O brasso ghe toccava,
Da lì a ûn pö ghe leccava
O naso e o mento;
Ciù ardïo da lì a ûn momento
Tiava ûnn-a granfignænn-a,
Ghe dava ûnn-a dentænn-a,
Ma leggëa;
Poi ghe desfava a cëa
A forza de testæ,
Co-i êuggi stralûnæ
Sempre runfando;
Pin de fraschette andando
O ghe treppava in gïo,
Piggiava poi l’asbrïo
Per sätâ in spalla;
A Figgia se ghe scialla
Treppando comme lê,
Co-e moen, co-a bocca e i pê
A l’intissava;
O Gatto s’ascädava,
Ma a forza de treppâ,
Montâ, chinnâ, leccâ
Con tanto amô,
O ghe dè da treitô
Unn-a dentâ da can,
Ghe pertûzò ûnn-a man,
E o scappò via.
A Figgia stramortïa
Un grand’ûrlo a cacciò,
O Pappà capitò,
Che instruïo de tûtto,
Ghe disse serio, e brûtto:
Me ne rincresce caa,
Ma ûnn’atra votta impaa
De no te fiâ:
Chi ha o vizio d’addentâ
Per bûrla e per piaxeì
Addenta poi davveì
E per capriçio,
Perchè a finzion do vizio
A se converte spesso
Ne-o brûtto vizio stesso,
Nè ciû a se cangia.
