O Cicciollâ 1930/Randa pastorale
| ←Cristoffaro Colombo a ra scoverta de re Indie | O Cicciollâ de Randa Pastorale de Pantalin Moasaña |
A ra S.ra Dorothea Spinnora Gentì→ |
| lasciòu inalterâ a grafia do "Cicciollâ". |
Randa Pastorale
- Pastoî semo, donne mae,
- Pastoî semo, donne mae,
Che in montagna ve inviemo,
Perché dave lá vogiemo
Gren diletti se ne amae:
Pastoì semo, donne mae.
Sotta i erbori, contenti,
Con voi, donne, balleremo
E a ra nêutte döçementi
Strenze ì eûggi ve faremo,
Che noi ätri gûsteremo
D’ogni commodo che haggiae:
Pastoî semo, donne mae.
Se ro leto é dûro assae
Onde, belle, noi dormimo,
Çitten semo delichae,
Che in montagna ghe godimo,
Ra durezza compatimo
Per sta freschi aora de stae.
Pastoî semo, donne mae.
Ní de çimexe hemo poira,
Ní de pruxe se ghe sente,
Che ogni dí con ra spazzoira
Nettezemo intregamente,
Che con noi allegramente
Virerei, se ghe restae.
Pastoî semo, donne mae.