O Cicciollâ 1930/A mae Beppinn-a!
| ←Nostalgia | O Cicciollâ de A mae Beppinn-a! |
Donne moderne!→ |
| lasciòu inalterâ a grafia do "Cicciollâ". |
I
Mi ve canto a mae Beppinn-a,
Tûtta sciamme, tûtta, ardô,
Stûzzicante, biricchinn-a,
Bella proprio comme o sô!
Sensa fronzoli nè inganni,
Comme a l’ha faeta seû moae,
Con l’orgoglio di vint’anni
A l’è a morte di innamoâe.
O Beppinn-a graziosinn-a,
Con doî eûggi comme i teû,
Ti siae sempre a mae reginn-a,
A padronn-a do mae coêu.
Quando a sciorte pe andâ a spassio,
A brassetto de seû moâe,
Tutte e gente do palassio
A-i barcoin son affacciâe;
No se stûffan mai d’ammiâla,
No se stancan de lödâla
Pe-a bellessa do pellamme,
Pe-i cavelli cô do rarnme.
O Beppinn-a graziosinn-a,
Con doi eûggi comme i teû,
Ti siae sempre a mae reginn-a,
A padronn-a do mae coêu.
Quando a passa pe andâ ai treûggi
Co-a corbetta sotto a-o brasso,
I zoenotti sbâran i eûggi
E zû complimenti a sguasso:
« Bella faccia, e che rissetti! »
« Che sorriso incantatô! »
E me pän tanti bricchetti
In te man d’ûn fûmmatô.
O Beppinn-a graziosinn-a.,
Con doî eûggi comme i teû,
Ti siae sempre a mae reginn-a,
A padronn-a do mae coêu.