Ms. Ricci 176/Raccommandation d'unna serva a ro sig. Michié Adorno
| ←torna a l'endexo | Poesie in lengua Zeneise de Raccommandation d'unna serva a ro Sig.r Michié Adorno. |
A ro Sció Giambattista Montuoeggio→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Lustrissimo Patron
Ra mé condition
Comme ben sà Vosignoria Illustrissima
L'è sempre inclinatissima
Per fá comm'a ri hommi se conven
A sercá onde se può de mette ben
E perchè sò che lé
Comm'a ponto in Pareiso San Miché
Per fá ben, per dá gusto
Fa l'ofitio dell'angero in ro giusto
Eccave donca questa meschinassa
Chi ven trovave a cà
Che se ra cosa va
Comm'in restreito lié dixe ch'a passa
O che ra mé zucchetta no l'intende
O che sta Donna l'ha raxon da vende
Miegio contá de lié sto bello caxo
Quest'è l'histuoeria linda
Lé si, a Maria Binda
Ra quá davanti a vuoi l'è interpellá
Per unna cosa dond'a n'ha che fá
Perchè za condanná
Fu tempo fa Maria Pissembonna
Chi haveiva come lé buttega averta
Ond'oura s'è fet'arro de personna
Se gh'orei vei fé leze ra referta
E se questo no basta andemmo avanti
Lié si ve menerà
Doi testmonij inanti
Con ri qué ben ra cosa a proverà
Si manco n'en ri piezo dro contorno
E mi che ri ho in seira manezé
Con ro nostro magnifico Pizzorno
Sò ch'en usi a spuá ra verité
Puoe miré s'a va giusto a ra reversa
Referiscian ch'a stava da ra serza
E sento zureran pe ra derera
Che lié no gh'è muoé steta in feto ò in voxe
Solo in cangio dra sersa a l'ha un po ciera
D'andá a ra zuoeggia un po sotto ra noxe
Si che quando sta Donna cieramente
Così presto in un sato
Fesse tocca con man li in magistrato
Ch'a l'ha buoin fondamenti
E che de compassion foisan ben degni
Lié ri prega in sta supprica in concordia
A faghe carité de quelli pegni
O per giustitia o per misericordia.