Ms. Ricci 176/Lamento d'unna zovena mariá con un viegio
| ←torna a-a lista di atri scriti | Poesie in lengua Zeneise de Lamento d'unna zovena mariá con un viegio |
Risposta a unna lettera dro P. D. Filippo Merello scrita da ro P. D. Paris M.a Fossa→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti specce insce-e paole moççe e insci-i monoscillabi: acento grave = vocale curta, acento aguçço = vocale longa |
1
Pruoeva ro purgatuoerio in questo mondo
E sempre a ne puoe dí bon temp'addio
Con un doró chi n'ha ne fin ne fondo
Zovena ch'haggie un viegio per mario
Chi sé comme ro mié fastidioso
E per ciù zointa è deventoù giroso
2
No mangio muoe boccon che pro me fasse
Perche in casa se vive da marotti
Fé vostro conto che re zuoeggie grasse
Per mi son sempre mercordì scurotti
Ni muoé per Carlevá gh'e gueri miegio
Perche gh'e sempre Carlevá ro viegio
3
Guardé un poco se quest'è ben da scrive
E chi porreiva muoe trovaghe sęsmo
Donca se lié stà a regola de vive
Per soggetto ho mi assì da fá ro mesmo
E l'e, che l'é chi ciù de vinti seire
Ch'o ghe bast'un pa d'oeve, e re sò peire
4
De Ciavari ro vin ch'e si gustoso
Non ve crei che pre lié muoe se n'imbotte
Perche o dixe che l'e troppo fumoso
Ma de Rapallo ghe n'è pin re botte
E o no se me[tt]e a man finn'a Dená
Ch'a ri vegi ro dose ghe fa má
5
No te bastav'assé dra sò veggiessa
Senz'azonzeghe Amó ra girosia
Chi fa ch'a marasperme vaggo a messa
E mi per mi ogni visit'è finia
Perche fuoera i parenti prinzipé
Sò che manco me visita sò fré
6
In tutto quest'inverno n'ho posciuo
Zugá unna seira a stopa ò tre, do, asso
Ma femmo unna promera si all'aguo
Che con zinquantezinque o dixe passo
E se da mi m'inviesto lié da lesto
Sempre o me cianta con tirá ro resto
7
Perch'o sunaggia un po de chittaron
O ghe pa d'ese a lié quarche grand'hommo
E de questo ne fa ta profession
Ch'o no ra cede a nisciun varent'hommo
Ma creim'a mi che l'e un sonoù da rave
Perche o n'aggiusta muoe ra bott'in ciave.
8
E quand'o piggia in man ro sò instrumento
O ghe commensa a tempestá d'intorno
Me pa sentí ra fora dro bestento
Perche o no l'accorda in tutt'un giorno
Onde puoe o ceustra li così a ra piezo
E o rasc[c]ia per B. molle un pass'e miezo.
9
Quarche votta per fá dro zovenetto
O piggia l'archibuxo e ro netteza
E perche o vuoe fá cré ch'o sé un moschetto
Sempre con ra forchetta o ro maneza
E me besuoegna ciù votte aggiutaro
Quando de semme in sento o vuoé spararo
10
Se l'e in lietto o l'ha humuoi si stravaganti
Che vuoi no savei muoe donde piggiaro
Ch'ancuoe se leva de quattr'hore inanti
Doman no puoei de lietto destanaro
Ni pensé s'o no dorme d'adormive
Ne fin ch'o stagghe in lietto de vestive
11
No gh'e in casa barcuoin porte o fireure
Ch'o no stanghe, o no serre, ò ch'o no ciode
E o fa ogni votta queste monineure
E o cré che non re vegghe e che no i ode
Ma s'o me ghe fa mette un di ra man
Barcoin porte fireure s'arviran
12
Pensé pu ch'haggie perso ro servello
Chi se cré fá ra guardia a unna garzonna
S'in dio o no ten sempre quell'anello
Che dè a ro depentó quella personna
Parlo de quelle ch'haggian questa tacca
Perche manc'Argo puoe guardá unna vacca
13
Da puoe chi va sercando ro malanno
Ro truoeva ciù vexin che o no se creiva
E quande se ghe dixe: sé tò danno
O non occorre dí: non me ro creiva
Perche ra fama per so doggio scorno
Ro pubrica per nescio a son de corno.