Ms. Ricci 176/Exorta a ra patientia ro Sig. Poro Baxadonne

by Giurian Rosso

←torna a l'endexo

Poesie in lengua Zeneise de Giurian Rosso Exorta a ra patientia ro Sig.r Poro Baxadonne per unna casa ch'o l'oreiva accattá.

Cavagiero immascaroù donna dre frute a re Damme→

Da-o ms. Ricci.176, Arch. Stor. do Comun de Zena, www.storiapatriagenova.it.
azonto quarche acenti: acento grave = vocale curta, acento aguçço = vocale longa, -où = dittongo

Exorta a ra patientia ro Sig.^r Poro Baxadonne per unna casa ch'o l'oreiva accattá.

Lustrissimo Patron serto mi son,
Che non dè unna fontanna picceninna
Pretende d'azonz'egua a ra marinna
Ni un s[c]ciavo dá conseggi a ro patron.

2
Ma perchè n'ho mancoù za d'osservá
Che quando zuoega insemme doi zugoi,^[sic]
Ben spesse votte un li, chi stagghe a vei,
Cognosce megio cose s'ha da fá;

3
Per zò ra musa con re suoe raxoin,
Averte mala ve ra spranga chì,
S'a ve dà in tre l'humó dí comme mi,
Se no, dí che l'è larga da camin.

4
Unna votta me vègne unna postemma
Giusto comm'oura, e mentre ro Diavo
N'oreiva in fin, ch'a me vegnisse a cavo,
Mi gh'haveiva zuoe muoé ciù poca flemma.

5
Per aggiustara in somma con l'inciastro,
Dopp'haveigh'assazoù dotrei barbé,
Me ghe ne vègne un, ch'in tro mesté
Se stimava un Falloppia, un Zoroastro.

6
Si che per sto Diao ch'o me ghe misse
In tempo d'applicá ro lenitivo,
Servendo ra seruxa d'insentivo,
Poco mancò ch'a no s'incancarisse.

7
Un di Ferippo rè de Macedonia
Fava prová un cavallo, e in manezaro
Ogn'un con forsa oreiva dominaro,
Ma restàn tutti li testa de quonia.

8
Ro gran Lixandro, ch'havé gran servello,
Mentre ra forza non ro può remette,
Lé con l'inzegno e quattro caressette
Te ro fè vegní li comm'un agnello.

9
Per apportá remedio a serti muoé,
Per domá un hommo, ch'è tropp'ostinoù,
A remedij violenti non ghe croù,
Ma l'è antidoto bon l'humerité.

10
Ra patienza è figgia dra prudenza,
E chi con quest'imbragherà re taggie,
Tirerà da ro sò fin re muraggie,
Ch'in somma durum frangit patientia.