Ms. Ricci 176/Che se suoenne, che rebombe
| ←torna a-a lista di atri scriti | Poesie in lengua Zeneise [Ri barexelli] |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti specce insce-e paole tronche (lavó, presumí ecc.) e insci-i monoscillabi (mé, pé, sé pe distingoili da me, pe, se ecc.): acento grave = vocale curta, acento aguçço = vocale longa |
[Ri barexelli]
1
Che se suoenne, che rebombe
Quante corne han ri maxelli
Perchè ogn'un posse sentí
Dri famosi barexelli
Quello ch'oura son per dí
2
Che se ciocche piatti e schele
Caderoin, conche e conchette
Con re amore, e morté
De ste sosse mascharette
Per puoei dí re infamité.
3
Buscaggin ch'è ro superbo
L'ha per segno in faccia un sette
Ma st'infame malandrin
Dovereiva in tante fette
Ese feto unna mattin.
4
Troppa sost'ha st'insolente
Troppa sboria ha sto viggiacco
Sto mostasso retaggioù
Chi se pensa mette a sacco
Re personne d'ogni groù.
5
Lié se spaccia per Gradasso
Per Ruggiero, per Argante
Ma in sostanza l'è un potron
Un indegno, un gran forfante
Un mariollo, un infamon.
6
Unna vorpe l'è Morello
Bella vitta e mostassetti
Calamitta dro baston
Sà perá ri piccionetti
Finto, faso, leventon
7
L'è ciù faso che n'è Giudda
Che si ben ch'o rie in cera
Sempre studia d'inganná
Ma ro veggo andá in Gallera
Comm'un atro Cavagná
8
Carité grande sareiva
Ro sposaro con l'aniello
Pe re muoen d'un agozì
Primma che ro satarello
Sciù trei legni o fasse un di.
9
Lorenzin ch'è ro bizarro
Ciù cornix'o port'in tiesta
Che ri quadri de Borzon
So moggié prattica e lesta
Ghe e fa a so descrettion
10
Lié l'è bella e l'è corteise
Ni per poc'a se ghe mette
L'è provista de Pané
Dond'a ten re suoe tirette
Con l'insegna de corné
11
Guardé donca che ventura
Ha sto bravo barexello
Mentr'o puoe d'ogni saxon
Senz'havei spá ni cotiello
Con re corne fa costion.
12
Un treitó de primma crasse
Da marcá con ra tenaggia
L'è l'infame Ciavarin
Che da i vizij de Trandaggia
No descatta un dinarin
13
Sto forfante, sto mariollo
Chi savesse ri suoe treti
Comme son se stupiré
Mille furti che son feti
Da lié vegnan maneghé
14
Ch'a ra prattica dri furbi
E de gente chi sé laddra
Perchè spartan ri boccoin
Fa ro mesimo ogni squadra
De sti sbiri malandrin
15
Ladri grossi taggia borse
Chi assassinnan nuoett'e giorno
E fan cianze re masné
Senza puoira van d'attorno
De restaghe catturé
16
Un ch'aroba pe ra famme
Un feriollo, unna baranza
Caze subito in tra rè
Ma un chi spaccie quarche stanza
No se puoe savei chi l'è.
17
L'è politica da sbirri
Per sarvá ri suoe compagni
Piggiá ladri piccenin
A sto muoeo stan senza lagni
A mascia seir'e mattin
18
Se da case ò da buttieghe
Tanta rob'è portá via
Con gran danno dra Zitté
Tutt'è cappa ch'è cuxia
Da sti sbiri sceleré
19
Dim'un poco canaggiassa
Che sguassé senza mesura
D'ond'avei si bell'intrá
Non gh'è paga ni cattura
Ch'a ra fin ra posse dá
20
Buoin boccoin se se n'atruoeva
Tegní donne havei ro zuoego
Dan ro fondo a gren diné
Onde serto in quarche luoego
S'ha da dí che ri piggié
21
Messé Luize l'Ariosto
Ha descrito unna cagnetta
Chi cagava oro firoù
Ma per divera a ra s[c]cetta
Che l'haggié no me ro croù
22
Ch'haggié Donne ch'han dro guagno
Ro consento e vuoeggio daro
Ma per dí ra verité
Ro mossamme n'è si caro
Da guagná doppie a branché
23
Ve ra diggo chì a ra bonna
Quarch'os'atro ghe da miezo[sic]
Ch'anch'un di se scrovirà
Gh'e mestié d'atro che viezo
A ro sguasso che se fa
24
No pensé che no s'osserve
Con che pompa van per Ziena
Con che sboria se fan vei
Che con fá dra Polixena
Puoeran vacche sciù ri proei
25
Tant'anelli ch'han in dio
Tante Biscie ch'han d'intorno
D'onde vegnan no se sà
Ch'a ra fin per fane un corno
Poca paga se ghe dà
26
Ló s'aggiuttan quanto puoeran
Ma l'andá comme re strie
Tutte quante spietoré
L'è unna cosa da fá rie
Chi re vedde per re stré
27
Per crovise re magagne
Se perliscian con gianchetti
Con rossetto e soliman
Si che puoeran ri quadretti
Ch'ha depenti Zemignan
28
Vuoi re vei che tutte a feto
Con belletti a ciù non posso
Compariscian inciastré
Ma son marse fin all'osso
Son carogne sbudellé
29
Se pensé che sen Susanne
Queste porche ste potronne
Senza fallo dí se po
Che son vacche ...
Creiro a mi perchè ro sò
30
In tro fondego che tegnan
Unna votta ghe son steto
E merlussa gh'ha accattoù
Ma dro guagno che n'ho feto
L'ospiaretto n'è informoù
31
Pensé un poco comme possan
Spende tanto e fá dro bravo
Con re porte infranzesé
Che spalancan fi a ro s[c]cia[v]o
E ro boia e a gente té
32
Che raxon donca direto
Per defendete o' Morello[?]
E ti forte Buscaggin
Con l'infame barexello
Dro treitó dro Ciavarin[?]
33
Re catture ni ra paga
Ni ri vostri lazaretti
Chi se san si ben inciastrá
Se n'havessi atri traghetti
No porreivan muoé bastá
34
Dio v'aggiutte razza porca
Che co inzegno così destro
Sempr'havei doppie a foró
Steme lesti ch'un cavestro
Non ve dagghe un di doró
35
Vuoi ve crei che ra fortunna
Haggie in corpo ra semenza
De vuoi sbiri arsiassassin
Ma virei che penitenza
Farà fave unna mattin
36
Ro camin che tegní tutti
Va a ferí per stradda borca
E se vuoi ro seguité
Cazerei zu d'unna forca
Comm'a ponto merité
37
Bella cosa se vireiva
Se cantasse ro Giachetto
E ro compá Franseschin
Ve fareiva ro balletto
Stira collo sciù i spalloin
38
Tante trampe e furbarie
Che vuoi fé con tanti gusti
Non porran sempre durá
Che i patroin perche son giusti
Ve faran tutti apiccá.