Ms. Ricci 176/A ro Sig. Filippo Adorno
| ←torna a l'endexo | Poesie in lengua Zeneise de A ro Sig.r Filippo Adorno |
A ro Sig.r Zan'Antogno Spinelli - Madrid→ |
| Da-o ms. Ricci.176, Arch. Stor. do Comun de Zena, www.storiapatriagenova.it. azonto quarche acenti: acento grave = vocale curta, acento aguçço = vocale longa, -où = dittongo |
Signor Filippo, m'havei desfioù
Con dime che deman sarà ro giorno
Perchè questo destinoù,
E perchè a mi in bonna conclusion
Me tocca fá dre arme elettion,
Per non fá comme fan
Ri nostri Cavaglieri li a Milan,
Noi se voggiemmo batte all'ombra in cà,
L'arma a fuoeza de tapano sarà,
Sò ch'intendei perchè no sei merlotto,
In tutta somma vuoeggio dí ro gotto,
E con ro gotto, se sarei contento
Cose ghe va de drento;
Con patti, patron mio,
Che tutti in fin ri corpi che traremmo,
Vuoeggio se ri rendemmo
Sotto ro naso un dio.
E se re atre desfie,
Servan per dá ra morte,
E mi per contro, ch'ho ra morte in gritta,
Ametto questa chì, chi dà ra vitta;
Si che donca non resta,
Per finí questa festa,
Solo savei s'a ponto
All'hora destiná vuoi sarei pronto.