Ms. Ricci 1080-2/Allegreve donne mè
| ←torna a l'endexo | Ms. Ricci 1080, sec. XVIII Meize de Mazzo |
Prega Dio che ne libere da ra Peste nell'anno 1578→ |
1.
Allegreve donne mè
che ven fuoea à rallegrave
o ven fuoea chi vuoe dave
dri suoè mazzi naatuè
2.
Da quell'Isoe divinne
onde staggo con amò
vegno à vuì belle fantinne
pre scioave un pò l'umò
e rescadà o vostro sò
a ro sò dre mè contrè
Allegreve donne mè
3.
Ro sò vostro è freido tanto
c[']o fa cazze zù e fuoeggie
ma se o se mettea à canto
in ro fuoego dre me vuoeggie
e farò, ch'o se despuoeggie
dra sò trista qualitè.
Allegreve donne mè
4.
Gren camin, larghi e profondi
ho attastaò care patronne
pre toccà i vostri fondi
e pre mette erbette bonne,
e dre reixe novelonne
in re vostre belle prè.
Allegreve donne mè
5.
Mi passeì o streito, figgie
con un pò d'impedimento,
e pre unna, e pre due miggie
ghe troveì sempre dro stento
ma spointando ben ro vento
s'allargan presto e strè.
Allegreve donne mè
6.
Sciù ra fin drizzà fortunna
ro timon con gentillezza
verso questa mieza lunna
donde troevo ra bellezza
tutta pinna de freidezza
senza ninte de pietè.
Allegreve donne mè
7.
Per desfà ra neive crua
c'haveì dentro o desiderio
belle fuente son vegnua
in sto nobile emisferio
chi manten con giusto imperio
in piaxeì ra libertè.
Allegreve etc.
8.
Che ve porto Primaveia
sostegnua da dui venti
c'han portoù ra vostra veia
inscià sempre de contenti
e puoeì scorre allegramenti
quarche golfi smesurè.
Allegreve etc.
9.
E verto donne mazzo
si ve menno dri galanti
che desian quarche mazzo
ben ciantave con feste, e canti
a re vostre porte innanti
mentre non i refuè.
Allegreve etc.
10.
Se vorrei dri mazzi buoin
non mandè questi à spravè
che son forti, e zovenuin
ne muè loccian dentr'o piè
sciù piggieveri voentè
non fè ciù re desvitè.
Allegreve etc.
11.
O' che mazzi grossi, e drui
aura chi ve presentemmo
ma se ben son si porpui
con destrezza i cianteremmo
in ri luoeghi, che voggiemo
nuoette, e giorno sempre muoè.
Allegreve etc.
12.
Non besuoegnan de forchette
pre drissase in sciù re porte
onde l'hommo ri vuoè mette
che pre nostra bonna sorte
à re mosse stan si forte
che ri veì presto erborè.
Allegreve etc.
13.
Feve un poco, baaxetti
feve un poco à ro barcon
se gustè con gran diletti
mirà mazzi de saxon
ch'aura, e sempre pre vuì son
bell'in orde appaeggiè.
Allegreve etc.
14.
Temmo ben se ri vorrei
pre ventura manezà
che vuì presto ve virreì
l'ongarescha ben bagnà
pre che stizzan dra rozà
quando troppo i scrollè.
Allegreve etc.
15.
E con questo e me stelle
son sforzoù de dive addio
mentre ancoa seì novelle
cognosceì ro estaò scioio
che inveggiando pò moffio
sareì vieggie schersezè
Allegreve donne mè.