Ms. Marston 56/De messê san Augustino vescho e confessao
| ←torna a l'endexo | Manoscrito Marston 56, 1465 De messê san Augustino vescho e confessao. |
De la lezenda de messê san Beneito habao.→ |
| azonto maiuscole, pontezatua, tratin inte forme interrogative e diacrittichi (segondo a prononçia do XVIII sec. e e reggole do Prien do 1745; ecetto "ë" = æ, "ö" = œu); lasciao a tirde in sciâ "n", in corscivo i atre ligatue, in apiçe e coreçioin posterioî; tra e parentexi quaddre e lettie da azonze, tra e tonde quelle da esponze; |
Agostino grandissimo dotor de la provincia de Franssa è nao in la terra de Cartagenia e nao de honesto paire e de honesta maire. Lo paire avea nome Patrucio e la maire Monicha. Or ello pin de grande siencia fo filozofo e dotor grrandissimo[sic] de la santa Zexia e fo vescho de la citae de Sponenssa, là unde o vivè in grande santitae e finì lo ano de lo segnô corando CCCC, e vivè agni LII-VI, e stè vescho de Sponenssa agni IIII-. Lo nostro segnor Dee mostrà monti miracori depoî la soa morte per so amor.
Or vegando li Saraxin in quelle parte, li quë fem monti dani, e li crestiani preizem lo corpo de messê santo Augustino e si lo portàm in l'izora de Sardegna depoî la soa morte corando CCCCXVIII in lo tenpo de Leom papa.
Or sentando lo ree de li Lonbardi, devoto de messê santo Augustino, como l'izora de Sardegna era monto daniffichâ da li Saracini, lo papa ge mandà li söi anbassoi, che elli ge devessem mando[sic] lo corpo de messê santo Augustino, e per serti doim li anbassoi avem lo corpo, e con grande reverencia e' l'adussem fin a Zenoa. E vogando levâ questo beneito corpo, elli non lo poèm möve de lo lögo unde ello era possao, ni mai non lo poèm möve fin a tanto che fem fâ una zexia a Zenoa a soa reverencia. E questo miracoro mostrà lo nostro Segnor Dee, e cossì fo faita la zexia. E pöa con grande honô e reverencia e' lo portàm in la citae de Pavia e si lo missem in la zexia de san Poro Celdoro monto honoreivementi.
Or seando um in Pavia chi avea monto amor e reverencia in santo Augustino, si dè monta monea a um monego per avei um dio de santo Augustino. E lo monego, resevoto che l'ave la monea, si ge dè um dio de um atro monego morto fassao de um sendao, e quello lo resevè devotamenti. E vegando lo nostro Segnor Dee la devociom e la fe' che questo avea in questo dio, si lo pigà e butàllo via e preize um dio de santo Augustino e si ge lo dè. E partandose questo da Pavia con questo dio, monti miracoli fè con lo dito dio. E cressando la fama de questo beneito dio per li miracori che ello faxea, o vègne la voxe in Pavia, e lo monego chi goardava lo corpo si dixeiva che non era veritae, ma che ello ge avea daito um atro dio. E elli zem e goardàm lo lögo unde era lo corpo e trovàm che ello avea men um dio de la man. E vegando so lo abao, si cassàm via lo dito monego de quello officio e duramenti o ge fè fâ penetencia.
E semegeivementi e' l'era um monego in Bergogna in um monestê chi era piamao Forchanoto, e per nome era ihamao Ugom, lo quâ era monto devoto de messê santo Augustino, lo quâ contuniamenti pregava lo nostro Segnor Dee e messê santo Augustino che o non lo lassase passâ de questa vita fin a lo dì de la soa festa. Avegnachè de XV dì avanti o fo monto agrevao de freve, e in la veiria de santo Augustino o parea che o fosse morto. E li monexi vi vegnî monta gente vestij de monte belle robe bianche chi tuti intràm in zexia, e aveam con lor um chi era vestio a modo de um vescho chi ge andava avanti. E um monego de questi servi de Dee vi questi, stagando ello a l'oraciom, de che o se maravegà monto e demandege[sic] unde elli andavam e che[sic] elli eram. E um de lor ge disse: "E' l'è messê santo Augustino con li söi comissi chi va a prende l'anima de Ugom so devoto per portalla in vita eterna." Questa devota gente intràn in fermaria, e staito per um pocho de spacio l'anima de questo Ugon se partì da lo corpo. La quar anima lo biao messê santo Augustino la portà in vita eterna.
Anchora è scrito che seando messê santo Augustino in lo mondo, che um iorno, lezando, ello vi um demonio chi ge passà davanti chi portava um grande libero in spalla. E messê santo Augustino lo schonzurà e dissege che ello ge dixesse che scriture eram quelle che o portava. E lo demonio ge disse che in quello libero g'era scrito le paccae[sic] de li homi, li quai contuniamenti ello andava recogando de dì e de nöte. E messê santo Augustino ge disse che se ello n'aveiva scrito nissum per ello, che o lo lezesse e che o ge lo manifestasse. E lo demonio ge mostrà lo libero e non ge trovà salvo che una fiâ o non avea dito coniheta. E lantô messê santo Augustino disse a lo demonio che ello non se partisse, e zessene in zexia e con grande devociom o disse coniheta, e pöa o tornà a lo demonio e si ge disse che ello lezesse anchora lo libero. Lo demonio goa[rdà i]n quello lögo unde era scrito santo Augustino e trovàge tuto spetegassao, e lo demonio ge disse: "Ti m'ai forte inganao, e peizame che te mostrasse mai lo mê libero." E lo demonio se partì monto conffuzo.
Anchora o se leze che corando lo ano de DCCCCXII, che monti homi maroti de diversse marotie, li quai eram circha IIII-, e queste eram de le contrae de Franssa, li quai andavam a Roma per vexitâ san Pero, persochè o g'era staito dito che lo so beneto[sic] corpo sanava monte infirmitae, e abiando questi passai li monti e seando a Pavia presso tre miga, e messê santo Augustino insiva de una xexia[sic] con la vestimenta religioza e ze incontra a questi, a li quai o demandà unde elli andavam, e questi ge dissem tuta la lor intenciom. E messê santo Augustino ge disse: "Andaivene a Pavia e lì demandai de la zexia de san Poro, e in quella zexia averei quella gracia che demandai e serei fai sanati." E questi ge dissem chi ello era. E ello ge disse: "E' sum santo Augustino vescho de la citae de Aponixi." E pöa deprezente o ge disparse. Or elli intràm in Pavia e fon a la zexia de san Poro, e intendando che lì era lo corpo de santo Augustino, tuti in grande voxe incomenssàm a dire[sic]: "Santo Augustino abi mizericordia de noi." E a queste voxe monta gente corssem e subitamenti da dosso de questi maroti monto sangoe ne insiva fin che elli fon a lo corpo de messê santo Augustino, unde e' fon tuti sanai e tornànsene inver caza lor e loando e regraciando lo nostro Segnor messê Ihum. Xpe. e lo gloriozo messê santo Augustino, lo quâ è beneito in seculla secullorum.
Amen.