Lunaio Regiña 1891/14
| ←Perchè fase aspëtä? | Lunaio zeneize compilao da-o sciô Regiña & C. pe l'anno 1891 de O nêuvo in arte |
No so ciû quello che vêuggio!→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
Lodo e stimmo o nêuvo in arte
Se l'artistico gh'attrêuvo,
Se ghe veddo quello nêuvo
Che d'ogni arte o l'è l'önô.
2.
Lodo e stimmo quell'inzegno
Chi m'inventa, chi me scrêuve
Cose bælle e cose nêuve
Sensa sforzo imitatô.
3.
Lodo e stimmo chi mostrando
Unn-a cosa sconosciûa
Tra e bellesse da natûa,
O no fa torto a-a veitæ.
4.
Ma m'addescia ûnn-a gran raggia
Chi se vanta e pavonezza
Ne-o ciamame a roba sgrezza
Miäcoi d'arte e novitæ.
5.
Un chi esponn-e di spegassi
Che veddemmo in çerte ostäie
Pin de rosso e de scemmaie.
Poei ciamalo ûn gran pittô?
6.
Un chi esponn-e quarche statua
Lunga e liscia comme ûn fûzo,
Ben che vêuggie coscì l'ûzo,
Poei ciamalo un gran scûltô?
7.
Poei ciamä gran müxicista
Un chi e bële v'allighisce,
Chi v'allöa, chi v'insordisce
Co-a sò mûxica arraggiâ?
8.
Un chi scrive çerte rimme
Lunghe, cûrte, larghe e streite,
Che da-o trêuggio ve pan cheite,
Un gran poeta o poei ciamä?
9.
Me sätiâ a malinconïa
De ciamä grand'architetto
Chi de gren mûggi de zetto
M'impe tûtta a mæ çittæ?
10.
Basta inträ donde s'esponn-e
Tutti i anni e Bælle Arti
Pe conosce quante scarti,
Quante bôra g'ha i pittoî.
11.
Basta inträ ne-i campisanti
Pe scrovï tûtto de stocco
Che grottesco, che barocco
Mettan fêua çerti scûltoî.
12.
Dio m'avvarde d'andä a-o teatro.
Pe no veddilo dezærto
Quande dan quarche conçerto
Certe fäme ûn pö ûzurpæ!
13.
Dio m'avvarde da-a lettûa
De cansoin e di sûnetti
Che da-e scimie de Stecchetti
Pe diamanti son spacciæ!
14.
Dio m'avvarde d'ammiä Zena
De lasciû da-o Castellasso
Pe no vedde zû dabbasso
Tante Chêulloe da fä orrô!