Lunaio Regiña 1891/13
| ←I mecenati do giorno | Lunaio zeneize compilao da-o sciô Regiña & C. pe l'anno 1891 de Perchè fase aspëtä? |
O nêuvo in arte→ |
| Zena, Stabilimento di Fræ Paghen, stradda Luccoi , n. 32 - exemprâ conservao inta Libraja Naçionâ Centrâ de Romma |
CANSONETTA
E perchè fase aspëtâ
Quande invitan a disnâ
In t'ûn caxo specialmente
Che ghe segge pin de gente
Tûtte instruïe, ben educhæ?
A me pä un'inciviltæ.
2.
L'aspëtä chi mai no ven
O fa dï roba da chen;
O l'angoscia scinn-a o chêugo
Ch'o l'azzunze sempre fêugo
E i ciû mëgio pittanzin
Ghe diventan polentin.
3.
Ma no manca o tipo brûtto
Che ghe pä leçito tûtto;
Che ghe pä ûnn-a bælla ûsanza
De vegnï sempre in tardanza
E de fave ancon saveì
Ch'o ghe vegne pe piaxeì.
4.
Quello bravo sciô Riccardo
Ne-o vegnï sempre in ritardo
Pä ch'o digghe in ton ridente:
Son vegnûo forzatamente
Pe poei fäghe o grande önô
De trovame chì con lö.
5.
Affannôu pezo che ûn can,
Co-o relêuio in t'ûnn-a man
Spunta sempre o sciô Rolando;
E pe smorfia poi mangiando
Pä ch'o digghe a-i convitæ:
Son vegnûo, ma no n'ho coæ!....
6.
Quande tarda o sciô Carlin
Pä ch'o digghe ogni pittin:
Sciscignori, a mæ personn-a
A n'ha mîga a faccia bonn-a
De corrï, de camminä
Pe assettase chì a mangiä!...
7.
Ven poi l'atro chi ve dixe:
M'ho cangiôu zà döe camixe
Pe sciûgame tûtto o sûo;
E poeì däme o benvegnûo
Pe-a mæ rara discrezion
Nell'ûzave compascion!...
8.
Quande sei zà all'insalatta
Spunta l'atro testa matta
Che con äia de despeto
Pä ch'o digghe: Me l'ho a peto!
No ghe vêu che di paizen
Pe trattame comme i chen!...
9.
Dopp'avei tanto aspëtôu
E ciû votte giastemmôu,
Questa brava gente onæsta
Un boccon ve o fan paei pæsta
Pe-o sussiego che se dan,
Pe-e gren smorfie che ve fan,