Lunaio Regiña 1888/Mammà che bæll'öxello
| ←A ûnn-a Scignorinn-a | Lunaio zeneize compilao da-o sciô Regiña & C. pe l'anno 1888 de Mammà che bæll'öxello |
Oh, son feliçe vixin a lê!→ |
Cansonetta
Mammà, che bæll'öxello!
Ti o veddi bäsigä
In sciä rammetta pinn-a
De goççe de rozâ?
Quell'äe, quella testinn-a,
Pan fæte co-o pennello.
Mammà, che bæll'öxello,
Chi o poëse ûn pö acciappâ!
2.
O mescia sempre a côa,
O dà de gren becchæ,
E sghêuando tûtto in gïo
A-i rïen inargentæ,
O manda ûn barbacïo
Con lungo ritornello.
Mammà, che bæll'öxello,
Se poëse l'acciappiæ!
3.
Cantando pâ ch'o rïe,
Ch'o l'aggie l'axillin,
Ch'o schitte, ch'o se scialle
Comme i figgiêu piccin
Che scöran e farfalle
Pe questo côsto e quello.
Mammà, che bæll'öxello,
Da dâghe duî baxin!
4.
De vedde o çê lûxente,
L'ægua, l'ærbetta, e scioî
Che forman ûn incanto,
O gode comme noî,
E ciù soâve o canto
Gh'ispira o tempo bello.
Mammà, che bæll'öxello
Ti senti? o fà cioî, cioî!
5.
Pe cornixioin e gronde,
Pe teiti e campanin
O piggia mille sghêui,
O pitta ogni pittin;
E poi con larghi rêui
Pe l'äia o fà moinello.
Mammà, che bæll'öxello,
S'o foïse chì vixin!
6.
Oh, spunta unn-a passoëta!
Ecco che van a sghêuâ,
Tra i canti e tra i regii
D'ûn vëgio lûxernâ.
Insemme son sparii
Pe-o gïo d'ûn pertûxello.
Mammà, che bæll'öxello!
Chi sà quand'o torniâ?