Lunaio Regiña 1886/L'Universcitæ de Zena

←Revista da Çittæ

Lunaio zeneize compilao da-o sciô Regiña & C. pe l'anno 1886 L'Universcitæ de Zena

In Löde da Barba - Canson→

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

L’UNIVERSCITÆ DE ZENA

---

Mi no so con che criterio,
Mi no so con che raxon
Se scordavan do sciö Berio
A famosa relazion.
Mi no so perchè o governo
Ne-o trattä questo argomento
Coscì grave e de momento
Comme l'ûniverscitæ,
O l'ûsasse leggeressa
Malafede e trascûranza
Lûxingando co-a speranza
Co-e lungannie ûnn-a çittæ.

Semmo drento in t'ûnn-a stalla?
Semmo ûn mûggio de strassoin
Da zûgane sempre ä balla,
Da passane pe mincioin?
Se se trattâ d’ûn’imposta,
D’ûnn-a tascia esorbitante
Comme popolo mercante
Semmo i primmi pe pagä.
Se se trattâ d’ûn diritto
Conosciûo da l'ûniverso
O pe drïto o pe traverso
No ne poemo profittâ.

Semmo privi d’ommi dotti?
Gh’è mancanza de voentæ
In ti nostri zovenotti
Da tegnîli fra i scordæ?
L’Ateneo da nostra Zena
O no vanta nell’istoia
Documento nè memoia
De l'antigo sò splendô ?
Semmo forse ne-a Beozia
De l'Italia? Semmo a Traxo
Da no fâne nisciûn caxo
D’ûn pittin de patrio amô?

I governi i ciù spûiozi
Do spuntä dell’istrûzion,
I governi sospettozi
Ghe tegnivan in prexon
I ommi dotti e de talento
E ghe i favan vegnî vegi,
Accordavan privilegi
A-i santuai do saveì.
Nell’etæ de l’ignoranza
Scinn-a i pappi e i cardinali
Se mostravan liberali
Verso i stûddi, se lezeì.

Ma chi Zena a l’ha di torti!.,.
Che Mameli e che Mazzin!.,.
Anche lô son colli storti...
Son Paolotti, son codin...

Un Caveri, ûn Casanêuva,
Un Viviani, ûn præ Spotorno,
Un Cabella, ûn præ Pizzorno
Son perfette nûllitæl...
Via, no fæ ciù i renitenti
Depûtæ do nostro Stato,
Ommi illûstri do Senato,
Addesciæve pe caitæ!

Son convinto e son persuaso
Che mettendo ûn pö giûdizio
No arrûffieì ciù quello naso,
No corrieí ciù a precipizio
Ne-o negâne (ûn privilegio?)
Un diritto sacrosanto!
Un diritto che da tanto
Anche voî riconosceì.
Son persuaso che, sentindo
Questa longa cantilena,
L’Ateneo da nostra Zena
De primm’ordine o faieì.
Mentre stavimo esortando
Depûtæ, ministro e Stato
Questa lezze da-o Senato
Se metteìva in discussion.

Viva, viva o sciö Governo,
Viva i nostri Senatoî
Che cacciavan a quaterno
I testardi oppoxitoì!
E mettendo in bælla lûxe
L’Ateneo da nostra Zena
Ne fan criä; scialla Manena!
Semmo stæti rispettæ.

E ottegnindo una vittoia
Emmo vista o fä gaggiardo
De Cabella e de Boccardo,
De Secondi e de Poistæ.