Lunaio Regiña 1885/Prefazion

Lunaio zeneize compilao da-o sciô Regiña & C. pe l'anno 1885
Prefaçion

Zena, Tip.-Lit. di Fræ Paghen, stradda Luccoi , n. 52 - exemprâ conservao inta Libraja Naçionâ Centrâ de Romma

PREFAZION

Oh, mì poveo sciö Reginn-a,
Questa votta ö sa o Segnô
Se da-i pissi da marscinn-a
Ghe sciortîva o bon ûmô;
Se v'aveìva preparôu
Da tegnîve o chêu resciuôu!

V'appægiâva ciû sûnetti,
Ciû ballate e ciû cansoin
Che parlavan d'öxelletti,
Do pan döçe, de cappoin,
De raviêu; ma o sciö Nicolla
Me troncava ogni parolla?...

[p. 4 modifica]

Prego, invoco barba Apollo
Ch'o m'accorde o chittarin,
Me g'appendo scinn-a a-o collo
Pe crovîlo de baxin,
Ma lê, rouzo e mäcontento,
O me rompe l'instrûmento!...

Dond'appunto o Canocciale
Veddo ciento, despeazion,
E miseia generale
Cienta zà, da cianze ancon
Pe chì sà profetizzâ
In to tempo chi vegniâ.

Veddo là l'agricoltúa
Chi me dixe ciæo lampante:
Se ne-a nêuva Procedûa
No ghe fan quarche variante
Succedian di brûtti guai
Fra paizen e proprietai.

[p. 5 modifica]

Veddo a Scozia in gran sollevo
Là ne-a parte di paizen
Perchè lezzi ä Medio Evo
L'Inghiltæra ghe manten
Con lasciä l'agricoltûa
All'arbitrio dell'ûzûa.

E commêuvise l'Irlanda
Veddo ai sbraggi di sò fræ,
Veddo a larga propaganda
Pe tegnîli sollevæ
Con apostoli Fenien
Che preparan, i vulchen.

L'Inghiltæra dormiggioza
A ne scrêuve dä lontan
A corrente minaccioza
Chi se sparze all'Indostan
E va a franzise in Egitto?
S'a no a scrêuve, staggo sitto..

[p. 6 modifica]

Veddo o Belgio e i Paixi Bassi
Minacciâ guære civili;
Veddo i atti, veddo i passi,
Veddo e sciabbre, veddo i stili,
Veddo e punte, veddo i fî
Zà lì pronti pe colpî!...

Sotto ûn çê nûviozo e scûo
Veddo a Fransa da vixin
Chi roziggia ûn osso dûo
Ne-a conquista do Tohkin
Mentre o birbo sciö Nicolla
D'arrescözo te ghe a scrolla.

Veddo lì chi so zinzann-a,
A no fä comme a no dî,
A politica italiann-a;
E ghe veddo digerî
Santamente de maschæ
Che nisciûn l'ha mai piggiæ.

[p. 7 modifica]

Ancoassæ che o gran stellon
Dell'Italia o ne sarviâ
Da qualunque ûmiliazion
Chi ne voëse minacciâ
Con sorpreìze diplomatiche,
Paolottesehe o democratiche.

Ancoassæ che bon segnale
Ne dà i treì Imperatoî
Do disarmo generale;
Perchè dunque povei noî,
Se trovieiscimo isolæ
Pe mancanza d'alleæ!

E con noi l'Europa tûtta
A fa voti e a spera in lô
Pe no veddisela brûtta
Con sò danno e dizonô
Mentre cöre o Singao brûtto
Pe-e caserme e dappertûtto.

[p. 8 modifica]

Se milioni de sordatti
Diventian agricoltoî,
Se n’accorzan scïnn-a i gatti
Che cessian i malûmoî,
E g'aviemo l'abbondanza,
E ricchessa ne-a Finanza.

Con e tasce diminuïe
O commercio s'aumentiâ;
E, trovando scinn-a e prïe
Da guägnase da mangiâ,
Con ûn pö de moscitæ
E prexoìn saian serræ

Fra travaggio e capitale
Dominandoghe a raxon
Per impûlso generale
Saiâ söda l'istrûzion;
E pe stimma e pe decôu
Ritorniemo a-i tempi d'ôu!