Lûnäio zeneize 1932/I ratti mâcontenti
| ←E spighe e o papäveo | Lûnäio zeneize pe l'Anno bisesto 1932 de I ratti mâcontenti |
A çigâ→ |
In te ûn gran magasin de frûta secca
e d'ätro ben de Dio,
döî ratti, ch'aïvan sempre vissûo a-a stecca
aveivan fæto o nïo,
e, feliçi, contenti
de poëise, finalmente, levâ a famme,
travaggiavan de denti
drento i sacchi de nöxe e in to salamme,
tanto ch'ëan diventæ
riondi e lûstri che païvan de vellûo.
Ma però, servassæ,
non ostante che a foïse ûnn-a cöcagna,
sens'äia, coscì a-o scûo,
ghe païva d'ëse drento a ûnn-a prexon,
e se ne son stûffæ;
tanto che, sensa faghe riflesciòn,
han deciso de andäsene in campagna.
Pe i primmi tempi tûtto andava ben,
allegri e con l'axillo
treppavan in to fen,
rosiggiavan legûmmi e quarche grillo,
no aveivan de anscietæ
e viveivan in piena libertæ.
Ma l'è vegnûo l'inverno e a tramontann-a
continuando a sciûsciâ,
a-i fäva möî da-o freido drento a tann-a,
grilli no se ne poëiva ciù trovâ,
e i nostri döî rattin
son partïi pe tornâ in to magasin.
Questa vòtta, però, gh'ëa drento ûn gatto
che o-i ha sbranæ in sce l'atto.