Lûnäio zeneize 1932/Cuxinn-a? Sci!... ma poca
| ←Proverbi provæ | Lûnäio zeneize pe l'Anno bisesto 1932 de Cuxinn-a? Sci!... ma poca |
E troffie→ |
(Un pransetto pe sei personn-e)
Con trei etti de magro e ûnn-a gallinn-a,
preparæ o broddo pe fâ a menestrinn-a,
çioûla, séllao, carotta, pe condïo
che o no segge nè fatto nè savoïo...
Ma se dovesse continûâ in poexïa
a saiæ troppo lunga a litanïa,
coscì ve-o diggo comme o diæ parlando,
o ve interessa? Alloa ve-o raccomando.
MENESTRA — Sbattei ben træ
œuve fresche, azzunzeighe a poco
pe vòtta ûn cûggiâ de fænn-a finn-a
unn-a cûggiarâ de parmixan, mescciæ ben tûtto insemme e lasciælo
cazze adaxo adaxo in ta pûgnatta
quando o broddo o l'è ben boggente. Doppo döî o trei menûti servî
in töa.
— Se ve piaxe che a pasta a segge ûn pô ciû a-o dente, allöa piggiæ döe œuve fresche fæ a pasta comme pe fâ i taggiæn, ma ciû dûa che segge poscibile, poi grattæla comme o formaggio e fæla chœuxe quanto basta.
GALLINN-A — MAIONNEISE — Quando a gallinn-a che a l'è servïa pe fâ o broddo a l'è freida levæghe tûtte e osse e disponeì o magro in te unn-a fiammenghilla. Intanto preparæ a parte, a maionneise.
Sciccomme tanti trœuvan de difficoltæ a fäla, ecco ûn scistema semplice e segûo:
Sbattei ben ben döî rosci d'œuvo freschi, e quando son ben montæ, azzunzeighe poco pe vòtta tanto œuio quante creddeì, tegnindo presente che ciû se ghe ne mette, ciû a maionneise a diventa dûa. Quando veddeì che a l'è a-o punto, metteighe poco a poco l'agro de ûn limon e tanta sâ quante l'è necessaio.
In sce a gallinn-a taggiæghe primma a fettinn-e döî o treì chigheûmetti in te l'axòu, e di funzi in addobbo, azunzéighe ûn pô de tappani e quarche oëiva sens'osso e crovî tûtto co-a maionneise ch'eì preparôu. Se gh'è quarche triffolo o no ghe stà mâ.
SALAMME DE CARNE — Sei etti de magro de manzo o de vitella senza nervetti (puro magro). Se battan ben ben, in sce o taggiôu con o cotello. insemme a ûn spigo d'aggio e ûn pô de persa. Se ghe azzunze ûn cûggiâ de parmixan e ûn pô de moula de pan bagnâ in to læte. ûn etto de pasta de lûganega. treì rosci e doî gianchi d'œuvo. Se ne forma ûn pan che bezêugna passâ in to gianco d'œuvo che s'è tegnûo da-a parte doppo aveilo sbattûo a fiocca, e poi o se passa in to pan grattôu comme e cotellette a-a milaneise. O se fà ben rostî in to bûtiro e ûn pô d'œuio, e o se serve con contorno de mascè o de spinasci.
INSALATTA de staggion — FRUTA. FORMAGGIO e DOÇE — VIN a scelta segondo i gûsti.
UN DOÇE DE FAMIGGIA (pe beive). Con de œuve fresche, un pô de vainiglia o cannella o scorsa de limon: se fà a pasta comme pe fâ i taggiæn, azunzendoghe unn-a preisa de sâ e un pô de bicarbonato. A se taggia a tocchetti comme e troffie e a se fà frizze in meitæ œuio e meitæ strûto remesciando dûrante a cottûa. Ne risultan tante ballette che se servan, cäde o freide, doppo aveighe spolverôu in çimma do sûccao vainigliôu.