Esopo Zeneize 1822/O Rætin

by Martin Piaggio

←O Cavallo, o Bêu, l'Agnello, e l'Aze

Esopo Zeneize de Martin Piaggio O Rætin

O Matrimonio de l'Agno→

Zena, Stampaja Pagan, 1822 - Primma ediçion
${\widehat {eu}}$ e ${\widehat {ou}}$ en stæti reixi con êu e ôu.
In notta e diferençe co' l'ediçion do 1846.

FOA XXXIX.

O Rætin.

Un sï-sï de Rætin,
De quelli ben piccin,
Un giorno, ch’o passò
Da un lago, o se spegiò,
E in vedde e so ciûmette
Scûe con de pittette,^[1]
O disse: m’assumeggio
Per bacco! e son pareggio
Quæxi d’un-na Beccassa;
Lé a l’è ciù grande, e grassa,
A l’hà o becco ciù longo,
Ma mi ghe rimediò,
Mangiò, e beviò de longo,
E comme lé vegniò,
Alloa porriò çercâ
L’Umbrigo sotto tæra,
Porriò a-e Lumasse fâ,
A-i Grilli, e a-e Gatte guæra,
Sgu^eiò^[sic][2] pe-i monti, e a-o cian,
Porriò rivalizâ
Co-a Pernixe e o Faxan,
E cose staggo a fâ!...

O sciollo o raxonava
Così, ma o delirava,
Subito o prinçipiò
A dâse ben d’attorno,
E tanto o s’ingösciò
Mangiando nêutte e giorno,
Che o pesso de mincion
O moî^[3] d’indigestion.

O quanta Gente cazze in basso stato
Solo per ambizion
De voêi stâ a paragon
Di ricchi, e senza ciumme sgûeâ^[4] tropp’ato!

1. ciûmminn-e
   Con tante pittettinn-e
2. Andiö
3. moì
4. sghêuâ