Esopo Zeneize 1822/O Cavallo, e o Porco
| ←O Scolâo, e a Formigoa | Esopo Zeneize de O Cavallo, e o Porco |
O Pastô, e o Cacciôu→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
O Cavallo, e o Porco.
Gh’ëa un Porchetto
In t’un villaggio,
Chi no sciortiva
Mai d’in to staggio;
O no pensava
Che a ben mangiâ,
Beive e dormî,
Grugnî e rumâ;
In poco tempo
O vegnì grasso,
Che a stento o poeiva
Fâ qualche passo,
Ma con levâse
Tutte e so coæ
O s’annojava
Ne-a muscitæ;
In quello stato
Tristo, e indolente
O l’invidiava,
E dava mente
A un poveo bestia
De Cavallin,
Chi rebellava
Seìa e mattin
Un-na carozza
Con stento, e suô,
A freido, a cado,
A ægua, a sô,
Ma pù o vegniva
Sempre ciù bello,
Grasso, contento[1],
Visposo, e snello;
Mentre o façeiva
Ste riflessioin[2],
Passa a proposito
O Cavallin:
Ferma, o ghe sbraggia,
Bestia da tîo,
Dimme per cose?
(Tiando[3] un sospîo)
Ninte me piaxe,
Tutto me tedia,
Senza appetitto
Creppo d’inedia?
Mi, che a mæ vitta
Ea de mangiâ,
Beive, dormî,
Grugnî e rumâ!
E ti, che in cangio
Sempre te tocca
De tiâ, e stentâ
Cö morscio in bocca,
E che ti mangi
Un pö de fen,
Ti è sempre allegro,
E ti stæ ben.
Rispose pronto
O Cavallin:
Ti æ da savei,
Re di potroin,
Che vitta comoda,
Ozio, e leccaæja[4]
Partoiscian sempre
Tedio e bagiæja;
Che da-o travaggio
Co-a sobrietæ
Nasce o contento,
E a sanitæ.