Esopo Zeneize 1822/A Mosca, e o Moscin
| ←O Roscignêu, e o Cûcco | Esopo Zeneize de A Mosca, e o Moscin |
A Rêusa, e o Spinon→ |
| Zena, Stampaja Pagan, 1822 - Primma ediçion e en stæti reixi con êu e ôu. In notta e diferençe co' l'ediçion do 1846. |
A Mosca, e o Moscin.
L’ea do meize là d’agosto
Quando e grigoe fan l’amô,
E che secca a terra, e o costo
Da-o gran cado che fà o Sô;
Un Villan senza magagna,
Co-a sò faccia brustolïa,
O l’arava un-na campagna
In ti cien da Lombardia,
Tutto suento o s’affannava
Per guidâ l’aratro, e i bêu,
Con gran stento o gh'aggiuttava
Perchè andassan dove o vêu;
Un-na Mosca assæ arrogante,
Tutta pin-na d’impostûa,
Con un’aja da importante
Sorve o cäro a l’ëa vegnûa,
Sgûeando[1] forte, e mosconnando,
E corrindo ciù ch’a pêu,
A l’andava rondezando
Sorve l'ommo, e sorve i bêu,
Impaziente a no se posa,
A vêu fâ da necessaja,
Che ghe pâ d’êse qualcosa,
A và zù spaccando[2] l’aja,
Mentre a l’ea così[3] in faccende
Ghe passò appresso un Moscin,
O l’ammïa, ma o no comprende,
O ghe dixe, ma ciannin,
Dimme un pò, dove ti væ,
Mosca caa, così[4] affannâ?
Cose diascoa mai ti fæ,
Che ti corri[5] invexendâ?
Ghe rispose co' arroganza[6]
Quell’insetto indispettio,
« Grandi affari d’importanza!
« Ti n’è[7] d’êuggi! o ti è stordio?
« Semmo quattro chi occupæ,
« Ti domandi cose femmo,
« Pezzo d'aze! ti nö sæ?
« Semmo chi, che a terra aremmo.
Sta risposta presuntuosa
A fè rie finna o Moscin,
Ch’o lasciò a Mosca affannosa,
E o l’andò per sò camin.
A l'è assæ commune usanza,
De stimâse a-o dì d’anchêu
Personaggio d’importanza
Da chi è Mosca, e non è Bêu.