Due brocche de viovetta/III. O Paisan
| ←E Maschere - II. O Marcheize | Due brocche de viovetta de E Maschere - III. O Paisan |
Marionetti→ |
| ed. www.liberliber.it 2010 |
O Paisan
O bello Segnô cäo!
a l'é questa a çittæ?...
questa a l'é ca-do-diäo:
l'é mëgio coscì assæ
e valladde, e montagne,
i bricchi de ca mæ.
Lasciù gh'é de vivagne
fresche che fan bell'êuggi,
fromagge, êuve, castagne;
chi vin grammo di Schêuggi...
v'imbarlûgan duî gotti,
e a barca a va in ti schêuggi.
Oh! che brûtti zoenotti
tiæ sciù co-a cassa-ræa,
che facce da marotti!
Ch'a segge a gran monæa?
co segge o pensamento?
ch'a segge... a canniggæa,
e o troppo daghe drento?
Pre cöse (che no sente
a mæ Tonia) in zûamento,
se vedde çerte fuente,
che pan rêuze in sciö costo
e a passâghe d'arente
se bogge comme o mosto.