Due brocche de viovetta/A canson de Natale
| ←L'Arte poetica | Due brocche de viovetta de A canson de Natale |
Nêutte de San Silvestro→ |
| ed. www.liberliber.it 2010 |
A l'é vegia: - gardetto
mi l'ho sentia cantâ;
mûxica da organetto
ch'a vâ quello ch'a vâ:
ma pûre a me demöa
questa vegia canson,
se a-e öegie a me scigöa,
de questi giorni, ancon.
A l'é in te tûtte e ciasse
de Zena: – e, stæ a sentî
a l'arba: – da-e-terrasse
a fa: – chicchirichì!
e a cöre tûtt'in gio:
se resäta o figgiêu
che ancon mêzo addormio
o fa: – sensa lensêu!
A l'é in te l'aja pinn-a
de neive e... d'aççidenti;
a l'é chì e là: – in cuxinn-a
ve-a mugugnæ in ti denti
scrovindo e cassarolle,
sciûsciando in to fogoâ...
canson sensa parolle
che tûtti san cantâ:
a l'é drento ä pittansa
e in tö gotto de vin,
a l'impe tûtta a stansa
a ven zù da-o camin;
a mette ûn pö de brio
di nostri vegi in sen,
che bevendone ûn dio
de ciù, scordan Staggen:
a piaxe e a l'innamöa
in bocca di figgiêu:
chi vêu tella memöa,
chi ûnn'atra cösa vêu:
che cioccate de man,
che pestellâ di pê
pe ûnn-a fetta de pan
doçe, e ûn marronglaççê!
Döve a no l'é? se l'emmo
sentia de sà e de là:
dunque, allegri! e piggemmo
o mondo comme o va. –
L'é veo, da tûtte e ciasse
se canta sta canson;
l'é veo; ma gh'é de strasse
che dixan cö magon:
se ûnn'atra votta a-o mondo
ti vegnisci, o Mescia!...
Ti, che t'ei bello e biondo
ti no n'aivi in erlia;
Pe a gente proletaja
no gh'é ancon remiscion...
e strasse van a l'aja
sempre: – questa a canson. –