Due brocche de viovetta/A-o fâ do giorno
| ←A ûnn-a toâ d'amixi | Due brocche de viovetta de A-o fâ do giorno |
Ûnn-a gita a-o Monte→ |
| ed. www.liberliber.it 2010 |
Gh'é in te l'aja ûn odô
bon, san de primmaveja:
chì e là spunta ûnn-a sciô;
o tempo o l'é in candeja,
e pä che tûtto rie,
o monte, a valle, o çê,
e mûage, e ville, e prie,
e.... i caroggin de Prê:
ä mattin, de bonn'öa,
quande fa bon dormî,
o merlo zà o scigöa,
e a passoa a fa cî cî;
l'é ancon neigro o levante,
e da-i erboi, da-e gronde,
da mëzo a tûtte e ciante
se ciamma e se risponde:
chi risponde? chi ciamma?
chi zêuga a scondillô?
chi va de fêuggia in ramma
dando o bon giorno a-o sô?
chi monta sciù d'asbrïo?
chi se calûmma? chi
porta ûnn-a paggia a-o nïo
e ha ûn gran da fâ e da dî?....
O l'é ûn remescio e ûn gran
fru-fru d'äe: - ma chi pêu
tradûe o verso che fan
frenguelli e roscignêu?
finch.... zist.... o merlo poi
in bon zeneize o fi-
schia: Baciccia di cöi
Baciccia vegni chì!