Due brocche de viovetta de Carlo Malinverni
Ûnn-a gita a-o Monte
ed. www.liberliber.it 2010
[p. 59 modifica]
Ûnn-a gita a-o Monte[1]


Ah, chì almeno se respïa!
a fa ben quest'aja finn-a;
anchêu son ciù regaggïa;
säto e ballo, e a viovettinn-a
çerco e chêuggio, e poi ne fasso,
cäi scignori, ûn bello masso:
ah, chì almeno se respïa!

A fa ben quest'aja finn-a:
quest'ajetta de montagna
a recuvea: sta mattinn-a
a l'é proprio ûnn-a cocagna:
anchêu tocco o çe cö dio;
cöro e canto, säto e crio:
a fa ben quest'aja finn-a!

Anchêu son ciù regaggïa,
e me sento ciù appetitto;
chì nisciûn anchêu me cria,
chì nisciûn me dixe: sitto!
chì nisciûn dixe: a, b, c;
solo a passoa a fa: cì, cì:
anchêu son ciù regaggïa.

[p. 60 modifica]


Çerco e chêuggio a viovettinn-a,
scöro o grillo, acciappo a grigoa;
da ûnn-a verde rammettinn-a
de castagna, taggio a scigoa;
cöro dietro a farfalletta,
m'arrûbatto in sce l'erbetta....
çerco e chêuggio a viovettinn-a.

Ah, chì almeno se respïa!
chì gh'é ville, boschi e proeì:
gh'é l'amandoa e a sëxa scioïa,
gh'é l'ostaja coi sûnnoeì;
là gh'é a gëxa e i cappûççin,
ciù de däto Cianderlin…..
ah! chì almeno se respïa.

  1. Declamata da una bambina dell'Asilo della Foce.