Ciaravalle 1833/E lasagne

Ciaravalle zeneize pe l'anno 1833 de Martin Piaggio
E lasagne

E Lasagne.

SUNETTO.

Chi vêu mangiâ con famme e gusto grande
Vadde pe-i monti a fâ un-na campagnata,
Con quattro amixi, e primma là ghe mande
Chi prepare un-na bella lazagnata;

Zazuìn, doppo un-na lunga caminata
Ao comparî d’un piatto pin, chi spande
Tocco, e formaggio, fæta un-na cioccata,
L’assäto se ghe dà da tutte e bande;

A vedde che massacro! e che maxello!
Quanti sguari! che taggi! e labardæ!
E che boccoin! per fâghe o ritornello;

Sempre co-a bocca averta, e i denti affiæ,
Sussæ a fursin-na, perlecchæ o cottello,
E l’è un miacö^[sic] se o tondo no mangiæ.