Chittarin zeneize 1881/71

by Martin Piaggio

←Boñe feste

Chittarin zeneize de Martin Piaggio Boñe feste - a-o fræ Loigi

Lettia→

sunetto mandao insemme a-o regallo de Dênâ a-o fræ Loigi pe mezo da sœu Angja, doppo doz'anni che no se parlavan, e a paxe a fu tosto fæta

SÛNETTO ¹

Dunque s’aviä da stâ sempre ingrûgnæ?²
Dunque l’astio fra noî n’ha da passâ?...
Né dozz’anni de müri ³ fra duî fræ
Bastiän per fâli infin rappattûmâ!...

Ah!... se tornasse a-o mondo nostro poæ,
Se ûnn-a moæ, che no poemmo mai scordâ,
Vedessan... chi? Martin, Luigi scorsæ!...⁴
Ah! che o troppo desgûsto o i fæ crepâ!!!

Coscì scrïto ëa lasciù... ma forse anchêu
Questo destin maligno aviä ûnn-a fin,
Se a ti te parla, comme a mi, o tò chêu...

Ah tornemmo comm’ëimo i fræ ciù boin,
Senti e voxi do sangue e d’ûnn-a seu...
Damme a man!... chì gh’è a mæ... baxa Martin ⁵.