Chittarin zeneize 1881/391 Ringraçiamento
| ←Prollogo | Chittarin zeneize de Ringraçiamento |
Scherço→ |
| Reçitao da-i doi diletantin Loigi Piaggio e Gaitan Çechin dopp'ina raprezentaçion fæta inte 'n tiatrin de famiggia in caza de so meistro |
RINGRAZIAMENTO 1
G. Martìn, cose ti dixi?
M. Ninte.
G. E ti è lì insensôu?
Per stâ lì coscì mûtto, ti poeivi stâ assettôu!
M. Cöse ho da dî, Gaetan?...
G. Ti g'hæ da dî e da fâ:
Fra tûtti duî dovemmo l'ûdiensa ringraziâ.
M. Me paeì ti vegni matto! e cöse dî mai pêu
In mezo a tanta gente duî nesci de pettêu?
G. Fa conto d’ëse in schêua, ti sæ nèh, cöse femmo
Se o meistro o vorta l'êuggio...
M. Ätro che o sò! Ciarlemmo.
G. Ebben, ti fa a tò parte, n’aggi de soggezion,
Che mi fö a mæ.
M. Prinçipia. (G. va a mettersi a suo luogo)
Ti gh’ê?
G. E ti?
M. Ghe son.
G. Scignori gentiliscimi, che seì pin de bontæ
Per digerî i spropoxiti che ha dïto i nostri fræ,
Ve prego a compatîli, son comici piccin,
A perdonâ i difetti, e... (aggiûttime, Martin).
M. Scignore graziosiscime, pinn-e de gentilessa,
Ch'eì fæto l’ornamento, e dæta l’allegressa
A-a nostra demoettinn-a, vegnûe finn-a in Caignan
Per sentîne, e tediâve... (aggiûttime, Gaitan).
G. Ve ringraziemmo tûtti...
M. Tûtte ve ringraziemmo...
G. A nomme do sciö meistro...
M. De tûtti quanti semmo.
G. Se i nostri strofoggetti ve piaxe de sentî,
V’inviemmo per domenega...
M. Pregandove a vegnî.
G. No ve scordæ che a botte a dà quello ch’a pêu...
M. Coscì ve dæmo sempre comedie da figgiêu.
G. Scignori e scignorinn-e, ve fasso ûn baxaman
E me protesto vostro scciavo e lacchê Gaitan.
M. E mi ve fasso a tûtte e a tûtti ûn bello inchin,
E me protesto vostro servo e chêugo Martin.
.jpg)