Chittarin zeneize 1881/387 Prollogo
| ←Sunetto | Chittarin zeneize de Prollogo |
Ringraçiamento→ |
| Reçitao da 'n çerto Enrichetto Çelle primma da raprezentaçion da comeddia I pericoli d'un'imprudenza do Loigi Marcheize. |
PROLOGO 1
E aoa! cöse gh’ælo?... Miæ ûn pö che bella azion?..
Eimo chi tûtti insemme.. veddo tiâ sciù o tellon!..
Me davan dunque e ciance?.. Chi poeiva dûbitâ
Che me lasciassan solo per fâme caregâ?..
Cöse ho da fâ e da dî?... e cöse dî mai pêu
In faccia a tanta gente ûn strûsso de figgiêu?
Quante scignôe assettæ! Quanti ommi drïti in pê!
Se m’imbarlûga i êuggi, me pä che cazze o Çê...
Scignori reçitanti!... Scignori dilettanti!...
Nisciûn me vêu risponde!.. Fan oëge da mercanti!
Ben, dunque m’appattiö; ve vêuggio chi sprangâ,
A sò marso despëto, cöse han da recitâ[sic]
Questi scignori comici, e se l’han fæta a mi,
Perchè ghe päo gardetto 2, ghe a schisso ûn pö a lö ascì.
Ma voî, no me fischiæ, aggiæme compascion,
E, se no so spiegâme, capï per discrezion.
Veddieì dunque a sciâ Luigia, ch’a l’é ûnn-a brava moæ
De mi che son sò figgio, ma giösa de sò poæ
Sensa raxon nisciûnn-a, o solito de tûtte,
No diggo de voî atre, parlo de quelle brûtte.
Gh’è ûn çerto Roscillon, amigo sviscerôu...
Birbo, chi ghe credesse?., o pä Giûdda ciantôu!..
O tesce ûn çerto intrigo, veddieì in che manëa
Per fâ che Luigia vadde, insemme co-a camëa,
In casa sò de lê... Veddieì, quando ghe son,
Cöse ghe riesce fâ... Pesso de mascarson!
A mi ciù d’ûnn-a votta o mette o stilo ä gôa
Per causa d’ûn biggetto... Veddieì pe-a sò scignôa
Cöse sa fâ Carlotta con questo fäso brûtto.
Mi scappo a morte a caxo, passando per prezûtto.
Veddieì ûn galantommo (stampæla) ûn lûcandê
Scciavo d’ûnn-a vegiornia chi fa l'amô con lê.
Pe rie veddieì Riccardo villan e servitô
Sciollo che con Carlotta pretende fâ l'amô
Insemme con Roberto, fattô birbo e perverso,
Chi vêu fâ e ficche all’ätro, ma tûtto tempo perso.
Veddieì.... ma taxo o resto chi è o mëgio da comedia,
Perchè a mæ dicitûa m’accorzo ch’a ve tedia.
Ancon due paolettinn-e, se voî me o permetteì,
Per dîve che scenäi belli no ne veddieì.
No gh’emmo che due stanse, ûnn-a da locandê,
E ûn bosco chi fa rie dipinto in sciö pappê.
O palco é picciniscimo; quando ghe semmo assæ
Ghe stemmo lì a scabeccio, che paimmo pescisæ.
Comme se fa? s’inzëgna, ognûn fa quanto pêu,
E tûtti travaggemmo, compreiso mi pettêu,3
Con de l’impegno grande e a mascima attenzion,
Perché gh’emmo ûnn’ûdiensa chi mette soggezion,
A sa distingue, a giûdica de chi fa ben o mâ,
E chi no gh’e compaezi 4, meschin chi g’ha da fâ!
A mëgio a l'é l’orchestra che, eccetto duî o treì,
Son tûtti dilettanti; stæ attenti che sentieì
De belle scinfonie;.. ma é tempo de finî
E, per non ciù tediâve, ve prego a compatî
Tûtti i difetti nostri, sentîne, tollerâne,
E, per fâne coraggio, applaudî con cioccâne.
Tanto ottegnî speremmo da questa dotta ûdiensa,
A-a quæ per tûtti fasso ûmile riverensa.
.jpg)