Chittarin zeneize 1881/273 Capriççio

by Martin Piaggio

←Sunetto

Chittarin zeneize de Martin Piaggio Capriççio

Brindixi→

CAPRIÇIO ¹

Poeti cäi, no v’arraggiæ,
Fæ o piaxeì no ve sfiddæ,
Allûghæ ä pansa pe-e fighe.

Non ciù guæra, bonn-e fighe,
Perché o popolo o l'é sazio
De sentî sempre sbraggiâ,
E o vorrieiva ûn pö quëtâ.

Gran veitæ che ha dito Orazio
Cö sò genus irritabile!...
A l'è cosa insopportabile!

Quando e puïe son terminæ
E che e genti son calmæ,
Ogni giorno sciorte ûn poeta
Con di versci sgangheræ
Per fâ sovvegnî a cometa,
Per piccâse e per dî mâ
Ûn de l’ätro, e fâ giappâ
Tûtto Zena e ciù ûn caroggio
Con sûnnâ campann-e a doggio
Che finiscian per alloâ.

Vati cäi, no v’astissæ:
Cöse voeì che digghe Apollo?
Voeì ch’o fasse ûn protocollo?...
Bonn-e fighe, in paxe stæ,
Conservæ o becco pe-o vin,
Ché ven presto San Martin.

Se mi ho fæto de poexie
Ho çercôu de leva e puïe,
Cö Cordiale e cö Calmante,²
De comete tûtte quante
E de fâle piggiâ in rïe
Con racconti e di argomenti
Ciæi, lampanti e convinçenti,
E ciù d’ûn m’ha ringraziôu,
Prinçipiando da-o stampôu

E finindo co-i sbraggioin
Che vendeivan ciù cansoin.

Ma voi ätri, giöie cäe,
Che gratteì comme e çigäe,
E m’eì fæto a scimmia apprêuvo
Cöse eì mai dïto de nêuvo,
Consolante e persuadente
Per tranquillizzä ûn pö a gente
Diventâ spuïosa e inquieta
Per l'arrivo da cometa?
Ninte affæto, rien, nain, niente!

Ho creddûo aveì de l'aggiûtto
Da di poeti coalizzæ,
Ma ho trovôu neutralitæ
E da defezion per tûtto...

Assediôu ogni momento
Da cansoin fêua d’argomento,
Sêunni, föe, barboen, strionezzi,
Ciæti, crii, pettegolezzi
E de critiche analitiche
Con risposta a tûtte e critiche.

Ma, cäi vati garbatiscimi,
Besêugnava scrive primma

Pe aggiûttâme a levâ a puïa
Non sciortî a guæra finïa;
Manezzâ ûn pö mëgio a limma,
Schivâ e frasi rançie e sciolle,
Dî de cöse e non parolle,
Parlâ sempre o portoglian,
No mescciaghe l'italian
E no fâ versci fallii,
Perchè in Pindo son proibii.

Ma do resto, mi ve o zûo,
No me son mai ciù creddûo
De sentî in due settimann-e
Tante mûse portogliann-e.

Fasso mille complimenti
A-i Ballin ³ nêuvi nascenti,
Perchè ho letto de cansoin
graziose e interessanti,
Con di sali ben piccanti
Pe-i aspærti e pe-i mincioin.

Ghe ne fù qualcûnn-a fatta ⁴
Da cacciâ sotto a pûgnatta,
E ciù d’ûnn-a n’ho trovôu
Chi va fêua do semenôu,
Perchè a rogna troppo a gratta.

Poeti cäi, ghe vêu politica,
Quando se manezza a critica
No besêugna aveì l'arfê
Sempre in bocca, ma l’amé,^[sic]
E dêuveâlo con giûdizio;
Fæ fra voî ûn pö d’armistizio,
Silelote^[sic]5 pe ûn momento,
Cangiæ dunque d’argomento.

Bravo! Evviva o sciô G. C.
Bravo! Evviva o sciô G. B.
Con quell’ätro sciô D. L.
E quell’ätro sciô N. L.
Con tant’ätri sine nomine,
Che l'è ben giûsto che nomine
Per no fâ torto a nisciûn.
Tûtti i giorni ne nasce ûn,
E vegniä presto m’aspëto
Poeta tûtto l’alfabeto....

No metteì dunque ciû puïa
Ché a cometa a l’é scentâ
Per n’aveì ciù de spassoïa,
Co-a perrûcca spennaggiâ
E a no pêu fâ ciù de mâ:
Stæme allegri.... Scignoria!