Chittarin zeneize 1881/151 Sunetto

by Martin Piaggio

←Sunetto

Chittarin zeneize de Martin Piaggio Sunetto - a-o Zan Antogno Rustan e coleghi pi-a compliaçion de 'n vocabolaio zeneize

Sunetto→

SÛNETTO ¹

Sciô Zan Antonio, ho lètto con piaxeì
A lettera obbligante che m’eì scrïto
Co-i vostri versci belli in mæ davveì:
Ve ne ringrazio in rimma per fâ fïto.

Tegnï per accordôu quanto m’eì dïto,
E comandæme in tûtto dove voeì,
Perché Martin se fä sempre ûn piaxeì
De servîve ond’o peû de brasso drïto:

Coraggio, brava gente, travaggiæ
De chêu a l’opera patria començâ,
Ché ûn giorno ne vegnieì ricompensæ;

E mi pe-o primmo me mettiö a sbraggiâ,
A costo d’insordî tûtta a çittæ:
Viva chi ha fæto o Calepin ² nostrâ!