Cava in to remoin 1930/SETTEMBRE
| ←Agôsto | In to remoin de Settembre |
Ottôbre→ |
SETTEMBRE
Uga gûstosa e bella che l'agosto
t'ha faeti i grosci rappi matûrâ,
te spremmo e te trasformo in tanto mosto
che gioia indrento a-e venn-e o me mettiâ.
Ti boggi drento e tinn-e e ti borbôggi,
e ö forte odô me monta a-o çervellin;
a mae donnetta, attenta, a lava i dôggi
che impiemo poi ciû tardi de bon vin.
E penso intanto a-a primma imbriaegatûa,
a-a pansa descoverta de Nöè
ch'o malediva Cam, a sêu creatûa,
perchè o l'aveiva visto... l'âtro pôae.
Però con tûtto questo brûtto inizio
ö vin l'ha ö mondo intrego conquistôu
in grazia di vinae che, con giûdizïo,
con l'aegua l'han asciolto da-o peccôu.