Pagina:Cava in to remoin 1930.pdf/147

E penso intanto a-a primma imbriaegatûa,
a-a pansa descoverta de Nöè
ch'o malediva Cam, a sêu creatûa,
perchè o l'aveiva visto... l'âtro pôae.

Però con tûtto questo brûtto inizio
ö vin l'ha ö mondo intrego conquistôu
in grazia di vinae che, con giûdizïo,
con l'aegua l'han asciolto da-o peccôu.


OTTÔBRE

O boschi profûmmae pin de frescûa,
de canti d'oxelletti e de rïen,
ottôbre, maeducôu, ve desfigûa
e ve despêuggia pèzo di villen.

Ö freido o ve fa cazze e belle fêugge
che ve faxeivan tanto dexidiae,
e in gran moinelli ö vento o se l'inghêugge
e ne semenn-a i campi e e carezzae.

In to çê grixio e vostre ramme nûe
me pan brasse de gente disperâ
ch'a implore in gran silenzio e sêu creatûe,
ö ben dö quae l'é staeta despûggiâ.