Cava in to remoin 1930/MAZZO

In to remoin de Gioxeppe Cava
Mazzo

Che bello meize Mazzo, mae compagne,
pin d'incanti, profûmmi e seduzioîn;
son diventae giardin tûtte e campagne
e l'asenetto o canta e sêu cansoin.

L'é ö meize consacrôu a-e scampagnate,
a-e colazioin co-e fave e i salamin,
ö meize che ritorna e serenate,
i canti in sce-a chitara e ö mandolin.

'Sto meize ne fa vedde a vista döggia,
mentre se pä, ciû axilli diventae;
ö sangue drento e venn-e o ne simôggia
e s'é disposti a fâ bestialitae...

[p. 144 modifica]

Gallezzan baxi insimma a-o ventixello
che i mille odôi arroba a-e zôene sciôe;
tûtto revive a Mazzo e o fa ö franguello,
ma chí no sà cantâ ch'o ghe scigôe!...