Cava in to remoin 1930/ARVÎ

by Gioxeppe Cava

←Marso

In to remoin de Gioxeppe Cava Arvî

Mazzo→

ARVÎ

Arvî, fa bon dormî! divan i vègi,
ma a mî me pä ûnn-a mascima sbagliâ;
i zoveni d'anchêu ne dan di spëgi
e no se san d'in letto mai levâ.

Pe conto mae no trêuvo differensa
da questo a ûnn'atro meize pe dormî;
cö sêunno g'ho mai tanta confidensa
che tûtto l'anno o l'é ûn meize d'Arvî.

Però, quando gh'aveivo a mae Ginetta
in létto se ghe stava mègio assae:
se dîmo quarche dôçe parolletta
e i baxi se i scangiavimo a cassae.

Atro che Arvî! o l'ëa sempre d'Agosto,
e venn-e ne bóggivan da-a pascion,
a vitta a l'ëa pe noî sempre all'assusto
e colloudamo e molle dö saccon!