Cava in to remoin 1930/A-A PUNTA DA MAINETTA

In to remoin de Gioxeppe Cava
A-a punta da Mainetta

[p. 108 modifica]A-a PUNTA DA MAINETTA


I.


A l'artessa da Mainetta
in atteisa de sarpâ,
voî trövae là da-a Scaletta
in to gosso a dormiggiâ
sott'a-a lobbia ö barcaiêu[1]
pronto e remme a cacciâ in mâ –
moddi sgrûzzi, ma bon chêu –[2]
pe portave a barchezzâ.

[p. 109 modifica]
– Sciâ vêuan, signöri, ö gösso

ûn po' pe barchezzâ?
L'é chi amarôu co-a lobbia,
sciâ n'han che da montâ.
Ghe l'ho co-e remme e a veia,
sedili co-i cuscin;
però, se sciâ patiscian

no passo ö lanternin.[3]


II.


Quanto tempo là gh'an perso
aspëtando i forestê,
con e bele pe traverso,[4]
tanti vêgi dö mestê,
pronti a-o gïo che mai vegniva,
giastemmando taera e çê,
se ûnn-a cubbia compariva
no tornava ciû in derê.

[p. 110 modifica]
– Scignöri, gh'ò chí ö gösso

pronto pe andâ Arbissêua;
sciâ montan con fidûcia,
son barcaiêu de schêua.
O và che o pâ i 'na freccia,
no l'é 'na peigolea;[5]
sciâ amian l'é gianco e rosso,

l'ho battezzôu «Ciabrea».


III.


In to gösso te i rönsavan,
e-i faxeivan assettâ;
in ti scarmi i streppi intravan
e zû dagghela a vogâ.
Fêua dö porto, baccaletti,
cominsava ö becchezzâ,
i foestê co-i patiretti
protestavan pe sbarcâ.

[p. 111 modifica]
– Scignöri, no l'é ninte,

sciâ tegnan dûo ûn momento;
quattro pâae con forza
e semmo torna drento.
Coraggio, cai signori...
Ammia che sordattin!...
ûn po' de böllezûmme[6]

o ghe fa fâ i gattin.
  1. Lobbia: tenda posta a poppa a riparo del sole.
  2. Sgrûzzi: rustici.
  3. Lanternin: faro posto all'imboccatura del porto.
  4. Bele: budella.
  5. Peigolea: vecchio battello usato dai calafati per liquefare la pece.
  6. Böllezûmme: maretta.