Canzonetta (Ri sciaratti)
| Canzonetta de |
| Ediçion foscia di primmi de l'800 de "Ri sciaratti che sente madonna Parissœua sciù ra ciaçça de Pontexello" do Steva de Franchi, sença indicaçioin tipograffiche e con nomioze variaçioin che porieivan testimoniâ 'na difuza tradiçion orale. 'Na verscion conforme a l'originâ a fu ripubricâ in apendiçe a l'ediçion Carniggia de Comeddie do 1830, magara proppio aprœuv'a sto tipo de pubricaçioin chie. G. Musso Tra parentexi o nummero de strofa inta verscion originâ, marcao co l'asterisco e strofe assente da-a verscion originâ, ò profondamente modificæ. |
CANZONETTA
Comà caa, com'unna quarta
Mi ho ra testa invexendà
Da o romò, che fa ra gente
Da o sciaratto, che se sente
Tutt'o dì per sta contrà.
2.
In scio Cian de Pontexello
L'atro dì me son tirà.
Sei, che stav'a ra marinna,
Ma ho crioù con ra vexinna,
E de Cà me son stramuà
3.
Figgia caa ne dì, ne neutte
Chi non se peu ciù quetà
D'a mattin all'arba cæa
Mille voxe sempre in æa
Finn'a seja in tro serrà.
4.
A mattin quella dro læte
V'incomenz'a mojnà,
Ghe l'ho cheutto, ghe l'ho crùo
Ghe l'ho preizo, ghe l'ho pùo,
A chi se vœu rinfrescà?
5.
L'atra cria cò pejvee cada
D'intro forno l'hò levà:
Ven appreuo l'è chì boggia
Crescentinna, corri via;
DOnne presto, vegnì 'n sà.
6.
Donne cae, che poæan[1] balloin
Re peæ sentì crià:
Ciccolata, sfuggiatelle,
(E dapeu son Testajelle)
Chi unna man se vœ ascadà.
7.
Da lì a un pò passa un Zembetto
Con na voxe un pò scannà;
Chi s'accatta o mæ rætin,
Chi eu accattà ro cambræ fin:
Donne cae l'e chi o Mersà.
8.
Finna doi gh'en tutt'assemme,
Che i sentì forte sbraggià,
Dixe un chi ha brenno da vende,
L'atro, chi ha piccin'e grende
Chi ha carreghe d'accommodà?
9. (10.)
Ghe l'ho grosso l'aggio, l'aggio,
Chi eu dell'aggio da pestà?
Pe eutto soldi[sic] sento teste,
Chi endo l'aggio, a chi endo reste,
Chi endo l'aggio da sarvà?
10. (11.)
L'è cujos'a Bezagninna,
Che a sentì quasi[sic] cantà.
Chi s'accatta a leitughetta,
Chi eu o chighemao[sic], a radicetta,
L'armoazetta da fettà?
11. (13.)
Chi eu reccheutti, chi endo reccheutti
L'è un Villan de Coronà,
Con ra tora, con ro bacco.
Chi eu saasso, chi eu cheumacco,
Chi me ciamma: Chi eu accattà?
12. (9.)
Ro Villan che vende a scaà,
Ghò[sic] una rocca; unna cannà,
Ghò unna paa, unna toffanìa.
Ghò unn'imbùo? e l'atro cria
A chi ciamma u Rumentà.
13*
A compì poi ra facenda
Se gh'accresce ro Ferrà
Con re limme, con re masse,
Co bon'anno chi se o passe
Lè, o Fravego, e o Cadeà.
14. (29.)
E per dà dro Q scia stanga
Ghe mancava o Fiderà,
Fà o paston, ziassa semua,
Scrolla a casa, e a terra trema,
Che pà ch'eugge derruà.
15* (16.)
Con quell'atro streppa bele,
Che o l'è pezo da contrà,
Prinzipiante da violin,
Che o l'è lì seja, e mattin
Sempre a fave giastemà.
16* (17.)
E quell'atro ruzenento
Ch'è vegnuo de là da o Pò
Brutto, neigro, caffonento
Và criando ogni momento,
A chi spassa u Fummajò?
17*
Poi quel atro Maiffabene,
Co perde tutto a zugà,
Che intro batte ra Moggè
O fa sbraggi finn'a o Sè,
Perchè a famme o vœ scannà.
18*
Chi eu pappàvai, me scordava,
Chi eu pappàvai per quetà
Chi s'accatta l'amandoetta,
Dose, dose l'orivetta
Chi se vœ reccoverà?
19* (20.)
Non ghe manc'a fà a sò parte
Poi quell'atro Bancarà
con ra særa, cò martello
Che o ve fa sentì un flagello
da mandalo assè ciù in là.
20 (23.)
Ma son cose davei serto
Da fa giust'impazientà.
Quella mai non ra finisce
Chi boggie son re Panisse
I ho caœ[2] zù pe ammenestrà.
21.
Ve stimæ, che a sæ finia
Sì a n'è manco incomensà
Frixxeu, torta, pesci cadi
Via fæ presto, che ven tardi
Sbraggia forte u Tavernà.
22*
Non di ninte poi dre Donne
Quando s'euan onorà?
Za non batte moæ o relleujo,
Che non seunne o tremelleujo
Da per tutta ra contrà?
23*
Tontorronton: quest'è o Tambùo
Che ogni pò ven chi a passà;
E o v'astronna in ta manèa
Che voi ve preghæ in Galèa
Prima, che in questa contrà.
24*
Dirindindin: Za quest'a o tocco
Voi capì, l'è o Spezià,
Che se o n'ha da fà l'inguento
O sentì ogni momento
Cò pestello in tro mortà.
25 (24.)
Con quell'atra bagatella,
Che me gh'ea ancon scordà,
D'Asi carreghi, e de Mù
Coi Garzoin, che ghe an a o Q
A criando; trù, va la.
26 (22.)
Scolonne[3] da fà insalatta
Verso tardi ro Fornà,
Cade, cade chi eu de meje?
Dose, dose, chi eu de peje,
Cose feo? Non m'oei ciamma?
27 (25.)
In tro fondego a ra seja,
Ve ghe pà giust'unn'armà
Da tutt'oe, fin quando ceuve
Quattro, zinque, sette, neuve
Chi veu mora, chi eu zugà?
28 (26.)
Con sent'atri gren sciaratti,
Che gh'ò[r]æ troppo a contà,
Spie, Camalli, e Pellendoin,
Che se dan pugni, e pattoin,
Che ogni pò se veuan scannà.
29 (27.)
A ra neutte un gazzabuggio
Fa ra Gente innamorà
Cò violin, chi cò a chitara
Senti dighe: Tigre avara
Co cheu dùo ciù che l'àsà.
30 (28.)
Poi finio, che l'e stromenti
V'incomenza ro Fornà;
Battestinna fe ro pan:
Cria un Gatto, lua un Can:
Che mezz'oa non puoi[4] quetà.
31 (30.)
Non l'ho manco in cheu de serto
De vuoei stà in te sta contrà:
Veuggio andà a ro Castelasso
Ciuttost'erto che ciù basso,
E ciù in sciù se se peu andà.
32 (31.)
Via, bon giorno stem'allegra,
Miæ, non ve lascæ tentà
De vegni per Pontexello
A sentì sì gran flagello,
Ve salùo: Addio Comà.
FIN