Ri sciaratti che sente madonna Parissœua
| ←torna a-a lista di atri scriti | Ri sciaratti che sente madonna Parissœua sciu ra ciaçça de Pontexello de |
| (ediçion Carniglia - 1830). Lezi ascì O Sciäto de Zena do Martin Piaggio |
RI SCIARATTI
CHE SENTE
MADONNA PARISSŒUA
SCIU' RA CIAÇÇA DE PONTEXELLO
Canzon
de
Steva de Franchi.
Comâ caa, com'un-na quarta
Mi ho ra testa invexendâ
Dro rumô che fà ra gente,
Dro sciaratto che se sente
Tutto o dì per sta contrâ.
2.
Sciù ro cian de Pontexello
Meixi son me son tirâ.
Sei, che stavo a ra Marin-na:
Ma criei con ra vexin-na ,
E de cà me son stramuâ.
3.
Figgia caa! nè dì, nè nœutte
Chi no se pœu ciù quietâ.
De mattin all'arba cæra
Mille voxe sempre in æra,
Fin a seira intro serrâ.
4.
Ra matin quella dro læte
V'incomença a amoinâ,
E ve crìa: læte pùo,
Læte preizo, cœutto e crùo,
Se o vorei un pò assazâ.
5.
L'atra crìa: Co o peivee cada
D'int'ro forno l'ho levâ.
Ven a preuvo, l'è chi boggìa
Crescentin-na vegnî, via,
Chi se o fa un peçço taggiâ.
6.
Donne cae, che paan baloin
Re pee, sentî criâ:
Ciccolata, sfoggiatelle,
E dappœu son testarelle:
Un-na man chi s'œu ascadâ?
7.
Da lì a un po passa un zembetto;
Co un-na voxe ben scannâ.
Chi œu accattâ o rætin?
Chi œu accattâ o cambrefin?
Donne cae, l'è chi o merçâ.
8.
Fin-na duî gh'en tutti assemme,
E i sentî forte sbraggiâ.
Dixe un: Chi ha brenno da vende?
L'atro pâ ch o s'invexende,
Chi ha carreghe d'accomodâ?
9.
Ro villan: Chi vendo a scaa,
Chi œu un-na rocca, un-na canâ?
Chi œu un-na paa , un-na tofania?
Chi œu un imbùo? e l'atro cria:
A chi ciamma o rumentâ?
10.
Ghe l'ho grosso l'aggio , e l'aggio:
Chi vœu l'aggio da sarvâ?
Pe œutto sodi çento teste,
Chi vœu l'aggio, vendo reste,
Chi vœu l'aggio da pestâ?
11.
L'è cuioza a bezagnin-na,
Che a sentî squæxi cantâ.
Chi s'accatta a leitughetta,
O chigœumao, a radicetta,
L'armoassetta d'affettâ?
12.
Çinque o sei co e canzonette,
Fibbie, strinche da apointâ.
A chi vœu lunaio nœuo,
Che l'è sopra l'anno nœuo?
E gh'ho l'oca da zugâ.
13.
Chi œu recœutti, chi endo recœutti?
L'è un villan de sciu d'Arbâ,
Con ra tora, e con ro bacco.
Chi œu sœaççi? chi œu cœumacco?
Chi ghe vendo? Chi œu accattâ?
14.
Pontaiœu, agogge fin-ne,
Petenetti, e o caramâ.
A chi vœu l'amandoretta.
Dôçe dôçe l'orivetta.
Chi se vœu recoverâ?
15.
Chi œu spaççoie d'aççende o fœugo?
Chi endo e legne da bruxâ?
Gh'ho dra lesca e soffranin,
Gh'ho dre prie, di açarin.
Eh Comâ, cose ve pâ?
16.
Gh'è quell'atro alliga bele,
Chi v'ammaçça de sunâ,
Prinçipiante da violin,
Chi ha un-na lite co i cantin,
Che re oregge o m'œu stropiâ.
17.
Passa un moro caffonento
De Milan, chi ven ciù in là,
E chi cria: Donne, fiœu,
Chi vœu er spassa fumairœu?
Senza mai de sciao piggiâ.
18.
No ghe manca un tremelœurio ,
Che i barcoin me fa tappâ.
Tocca, dalli, picca presto,
O ghe fa sunâ ro tresto.
L'è un pestello dro speçiâ.
19.
Un chi cria con de cadenne,
Chi pa un'an-nima dannâ.
Chi volira olanda fina,
Bon fromaxio, acqua rexina,
Bona aringa, e bacalâ.
20.
Cion-na, seiga, picca, cianta,
Un seccante bancarâ.
Sciuscia, ammocca, batti, attiçça,
Nè s'afferman moæ un-na stiçça
Un ciappuçço e un çâderâ.
21.
Ro diao chi ve deriççe,
Canaggia scomenigâ.
Ve stimæ ch'a sæ finìa?
Torta cada, l'è chi bogìa,
Sento criâ ro Tavernâ.
22.
Çeolonne da fa insalatta.
Gh'ha un-na donna za attempâ,
E so sœu gh'ha peie cade,
So cugnâ fighe rubade,
E frisciœu co a peççigâ.
23.
Quando créo d'esse in repozo,
A n'è manco incomençâ.
Un-na cria, pa ch'a s'astiççe,
Son chi boggìe e paniççe,
L'ho caæ zu pe amenestrâ.
24.
Con quell'atra bagatella,
Che me gh'era ancon scordâ,
D'axi carreghi e de mû,
Co i garçoin, che gh'en a o cû,
A criando tru ... va là ...
25.
Int'ro fondego de seira,
Ve ghe pa squexi un'armâ.
Da tutte oe fin quando ciœuve,
Çinque, doa, tutte, œutto, nœuve.
A ra mourra vœuan zugâ.
26.
Con çent'atri gren sciaratti,
Che me fan inspaximâ.
Spie, camalli, e pellendoin,
Che se dan pugni e pattoin,
Ogni po se vœuan scannâ.
27.
A ra nœutte un gazzabuggio
F(r)a ra gente innamorâ.
Chi un violin, là un-na chitarra,
Chi ghe canta: Ti ê a mê cara,
Mæ cœu cao tutto çuccâ.
28.
E fornîo ri instrumenti,
Incomença ro fornâ:
[Battestin-na fæ o pan;]
Cria un gatto, lua un can.
Mi son tosto desperâ.
29.
E per dâ do cû sciu a stanga
Ghe mancava o fiderâ,
Fa o paston, siaçça a semoa;
Scrolla a casa, a tera tremoa,
Pa ch'a vœugge derruâ.
30.
No l'ho manco in cœu, Maniena,
De vorei in sta casa stâ .
Vœuggio andâ a ro Castelaçço,
O ciù erto o un po ciù basso,
O ciù in là se se pœu andâ.
31.
Chi finiscio, comâ cara;
Ma non ve lasciæ tentâ,
De vegnî a stâ in Pontexello ,
A soffrî sto gran fragello,
Chi non lascia respirâ.