Ms. Ricci 1080, sec. XVIII
Canzone dell'arti
[p. 55 modifica]

Canzone dell'arti ò sè mestiè
dri Zeneixi in sciù l'aria

dro Flon Flon


1
Belle d'esta contrà
presteme attenzion
se vorrei sentì cantà
un pochetto de Flon Flon
metteive ra camisa
feve tutte a ro barcon
flon flon piggiè e fadette
flon flon e ro striggion

2
I mestè d'esta sittè
cantà voeggio in conclusion
e de tutti i butteghè
ve dirò ra proffession
e de donne e de fantinne
cose vende i hommi ancon
flon flon mariev' vo' belle
flon flon mariev' vo' don

3
Comenseò in Ciazza Nuoeva
a cantà dre bezagninne
che ne vendan morcheioera
baxaicò e insalattinne
armoasse e ravanetti
cori neigri e prebogion
flon flon con dri spinassi
flon flon erbette ancon

4
G'han d'indivie e dre leitughe
dri chigo[e]mai e dre rave

[p. 56 modifica]

ravacori, e garbusi
scorsonera, e boraxe
con dell'aggio, e de sevolle
de meizanne e peveron
flon flon e o poro gianco
flon flon co ro navon

5
Ghe son puoè quelle d'Arbà
con re fighe verde, e pazze
che son fresche da a rozà
e rubade e briggiasotte
pizzalutte e caranchinne
con ro fighetto arbicon
flon flon e ro binello
flon flon chi è fresco e bon

6
Ghe son puoè e Bargaginne
che ne vendan prescinsuoere
e con di atre fantinne
che ne vendan dri oeve
dro lete puro e fresco
e con dro preiso ancon
flon flon vendan dra crema
flon flon dro buro bon

7
Ne veì quelle Nervinne
che son leste, e regagie
con re panee pinne
de roese, e de gazie
con dro bello giasemin
e dra scio de settron
flon flon con dri giassinti
flon flon e dra pascion

8
Ne fan quelli massetti
con doe ramme de mortin
quattro roese e duoi baraxetti
con un pò de giasemin

[p. 57 modifica]

duoi gan[o]efani incarnatti
quattro brocche da paxion
flon flon e i tegnan lesti
per quarche gallanton

9
Quando l'è a saxon dri fonzi
veì vegnì i montagnè
che se ben vegnan de lunzi
e ne son ben carreghè
a miegio parte ven da Recco
e da Campo, e Rossigion
flon flon da ro Saxello
flon flon, e da Maxon

10
E ne portan de rossi
e dri neigri ben assè
dri piccin e dri grossi
e de tutte e qualitè
da frizze, da impì
e da mette a rosto ancon
flon flon con ro boeuo
flon flon colè[sic] ben bon

11
Ghe son puoè i regatoin
che ne vendan romaniatte
con dri grossi meoin
moscattellinne regalate
a romaniatta de Taggia
a da Inverno ro meon
flon flon c'o l'è ben bello
flon flon c'o l'è ben bon

12
Ghe son puoè e vendeioere
che ghe n'han dri fruti assè
gan[sic] dre noxe, e de nisuoè
dri amandore, e meigranè
a carrobba, e o figo secco

[p. 58 modifica]

ro zebibbo bello, e bon
flon flon a castagna secca
flon flon corò settron

13
Gan dell'uga neigra, e rossa
e da gianca ben assè
verde paola, e barbarossa
moscattella in quantitè
con dre zizzoe, e nespoe bonne
e dre sciorbe e ro limon
flon flon, e l'armoinetto
flon flon, e ro brignon

14
E ghe n'han dre meie ruoese
fidecassia, e meie battinne
dre pippinne e rostigioe
con dre peie camoginne
peì reà, e peì succotto
moscattello, e peì spadon
flon flon e o peì gianchetto
flon flon co'ò brutto, e bon

15
Gan assì dre moire nanne
dre serexe, e perniguoin
con dri puisci e dre bazzanne
nazzaolle e bomboccoin
ghe son perseghi e briccoccoli
quande l'è a so saxon
flon flon, e dri pappavari
flon flon merelli ancon

16
Gan castagne in quantitè
dri balletti, e dre rostie
dri lavezzi e de perrè
ancon vendan dre spassoie
e dri brughi e dri fassetti

[p. 59 modifica]

e dre legne, e dro carbon
flon flon con dri schiupetti
flon flon forgari ancon

17
A ra quareizema ne crian
son chi cade re panisse
a fainà l'è chi boggia
a chi ghe ne taggio un pezzo
son farinè de castagnazzo
e de seixao, e de granon
flon flon a l'è chi drua, e vuinta
flon flon ch'a boggie ancon

18
E Fondeghere dell'oeio
e ne tegnan soffranin
s'an da dà dinè menui
ghe ne dan tanto stoppin
ò quattro spighi d'aggio
ò unna teiga de peveron
flon flon Mariev' belle
flon flon Mariev' don

19
Ghe son puoè e strapollanti
che ne vendan dri bescuoetti
puoen da sezze neigri, e gianchi
puo[e]n da sodo e puoe[n] da oetto
canestrelli e formaggiee
pan da vinti gianco e bon
flon flon mariev' vo' belle
flon flon mariev' don

20
Ghe son puoè i ciappaioè
che ghe n'han dri pesci assè
gan dri ancioe e dri pignuoè
dre sardenne e dri oggiè
con ro porpo e ra seppia
e l'anghilla e ro ghiggion

[p. 60 modifica]

flon flon e l'agostetta
flon flon, e o gronco bon

21
G'han dre boghe, e dri roscietti
dra nissuoea, e dro naziello
dri laxerti, e dri gianchetti
con dri musai, e dri arselle
rondanin, e paramie
con do tonno, e dro storion
flon flon e sarpe e legue
flon flon da razza ancon

22
In Sozzeivea, e ro Darsenà
e ancon in Sant'Andria
o ghe[sic] ciu d'un maxelà
chi vende manza non cattiva
vendan dre costigioee
con dro mattamà ben bon
flon flon dro figaretto
flon flon e dro rognon

23
Ghe son quelli dra vittella
che ne stan verso ro Muoè
gan laccietti e g'an servella
dro figaetto, e dro cuoè
con dra simma da impì
e da mette a rosto ancon
flon flon ch'ha[sic] l'è ciù gianca
che ro pieto de cappon

24
Ghe son puoè i cravè
che vendan dra carne ancon
si ben son tutti maxelè
l'è defferente a proffession
vendan piegoa e agnello
con dra crava e dro castron

[p. 61 modifica]

flon flon che son ben grassi
flon flon intro rognon

25
S'andè verso sant'Andria
li vexin a Noprion
Sentireì quella che cria
e l'o chi o berrodo bon
a unna da oetto ro parmo
ò duoi dinè per ogni boccon
flon flon o l'è chi cado
flon flon c'o fumma ancon

26
E ghe son dri tavernè
se vorrei fà colation
g'han dre torte e dre fritè
con dra manza, e dro castron
dra crava, e dra vittiella
un polastro, e un cappon
flon flon e dro stuffoù
flon flon con o rognon

27
G'han dri pesci a zemin
con dri friti e dri boggij
meizanne, e fonzi pin
con dri fasioè ben condij
dre panisse, e dri friscioè
dro meschioù, e dro prebogion
flon flon con dri cori neigri
con l'agro de limon

28
Se andè a S. Zenexo
ne sareì servij ben
spendereì un reà, e mezo
e disnerei da zitten
mangiereì pan, e menestra
e dra crava, e dro castron

[p. 62 modifica]

flon flon de l'insalatta
flon flon dra torta ancon

29
Ma se voreì dra bonna torta
e ben cuoetta, e assaxionà
ò de gè, ò de sevolla
ve dirò dond'ei d'andà
andè da Cainolla
ò li vexin a Noprion
flon flon, che a fan ben bonna
flon flon, e de saxon

30
Ma se puoè oesci mangià
unna bonna supetta
andè da o trippà
accattene unna lietta
accattè da sento pielle
che quell'è un bon boccon
flon flon son ciù gustose
flon flon che un cappon

31
S'ande a ro fondego per vin
guardè ben con chi havei da fà
sè i lauoanti, sè i patroin
che ro scarso ve vuoean dà
come a mezura le[sic] pinna
ghe ne dan un scrolagion
flon flon, e ve n'arroban
flon flon un dio de bon

32
S'andè a S. Mattè
bevereì dro dose vin
ò se nò a ra fiaschea
che l'è a Banchi asè vexin
intro corroggio[sic] de Neigri
lì se beive ro vin bon
flon flon se stà in sciù ro gotto
flon flon in conversation

[p. 63 modifica]

33
Li se beive dro vin grego,
malvasia, e vin de Cianti
Monferrà, e amaeno
Lenguadoche neigro, e gianco
dro nostrà, e dro moscattiello
e con dri bescuoetti ancon
flon flon mariev vo' belle
flon flon mariev vo' don

34
Ghe son quelli dri sciorbetti
che ne vendan limonata
de l'orzà, e dro lete fresco
dro caffè, e dra ciccolata
amarene, e agresto
dro merello fresco, e bon
flon flon dell'eguavitta
flon flon rozzoli bon

35
I cuoeghi gan polastri
dro rosto e pastizzetti
con dri cappoin ben grassi
e dri buoin canestrelletti
torte dose, e sfoggiattelle
con dri gobelletti ancon
flon flon dra zearia
flon flon dro lete bon

36
Ghe son puoè i polleiouè
che ne vendan notoren
dre pernixe, e rossignuoè
con dre quagie, e dri faxen
ro tordo, e ro merlo
ro polastro, e ro pollon
flon flon e a gallinna
flon flon e ro cappon

[p. 64 modifica]

37
Ghe son puoè i formaggiè
che g'han assè dro piaxentin
dre sassisse, e servelè,
con dro formaggio maiorchin
dro Gallura, e poponetto
mortadella, e sasison
flon flon con ro prezutto
flon flon c'o l'è ben bon

38
Vendan dro baccalà
dri scabecci, e dra toninna
pesci sarrè, e cavià
con dra carne porsinna
e dri pesci de mortà
con dro pescio salamon
flon flon e dro mosciamme
flon flon arenghi ancon

39
Ven a proeuo ro fideà
chi ne vende maccaroin
con a buttega ben armà
de lazagnette, e taggiarin
dri fidè grossi, e sottì
con da semora, e semoron
flon flon mariev uò belle
flon flon mariev uò don

40
Ghe son puoè i rubbaioè
che vendan castagne secche
dra lentiggia e dri faxioe
con dre fave, e dra favetta
dri poisci, e dri seixaij
dra scaggioea, e dro granon
flon flon mariev uò belle
flon flon mariev uò don

[p. 65 modifica]

41
Dre confetue i spietiè
g'han dri doxi, e dri bescuoetti
dri amandoe inzuccarè
dri collandri, e fenogetti
dri festecchi, e canellette
con un simamollo bon
flon flon, e ro peì dose
flon flon, e ro pernigon

42
Ghe son quelli da manuo
che vendan peivere, e spetie
sugo coetto, e sugo cruo
con dro riso, e zucche secche
dre puointette, e dri andarin
con dro zuccaro, e dro savon
flon flon dro reccanisso
flon flon ughetta ancon

43
Ghe son puoè i droghè
che g'han draganto, e gomma
e dra galla, e vetrioe
con dell'endego, e dra colla
dro màstiso, e insenso
con dro sorfano in cannon
flon flon che pe a rogna
flon flon o l'è ben bon

44
Ghe son quelli dra meixinna
che g'han povere, e sciroppi
egue dose, e meixinne
dri confeti per i marotti
dri inciastri, e dri inguenti
e dell'oeio de strazzon
flon flon e de mattiollo
flon flon dra casia ancon

[p. 66 modifica]

45
Quando puoè un l'è maotto
o miego o fa ciammà
lie o gh'ordina un sciroppo
unna meixinna, ò un'orzà
o se fa mostrà a lengua
o ghe tocca o poso ancon
flon flon mariev' vo' belle
flon flon mariev' vo' don

46
Ghe son puoè i barbè
che ne van a cavà sangue
da re muoen, e da ri piè
da re brazze, e da re gambe
miegan ciaghe, e ferie
e dri cancai ancon
flon flon diggo intro moro
flon flon diggo da bon

47
Ghe son puoè dri atri barbè
defferenti assè da quelli
questi fan o perrucchè
e accomodan cavelli
fan ra barba co i razoì
dell'egua, e dro savon
flon flon fan dre perucche
flon flon con ro cannon

48
Se da Banchi vuoi passè
ne vieì che stan attenti
tutti in riga assettè
diggo ben i cavadenti
aspietan se quarche amigo
o vorresse un braghè bon
flon flon ghe n'han per i hommi
flon flon per e donne ancon

[p. 67 modifica]

49
Se da i fraveghi andè
ghe virrei dre cose belle
dre forzinne, dri cuggiè
dre collanne, e dri annelle
sottocoppe, e tabacchiere
e dri stecchi belli ancon
flon flon che son d'argento
flon flon e d'oro bon

50
Ghe son puoè i corrallè
che vendan corralli fin
dri brazzalli, e dre gorere
dre magnette, e dri pendin
ghe n'han dri gianchi, e dri mori
e d'ogn'atra condition
flon flon mariev' vo' belle
flon flon mariev' vo' don

51
I pattè gh'han panni fin
con dro dimmito, e dro scotto
cristallinna, e buatin
dro Cadis, dro ciammelletto
dra saia, dra chinetta
sangalletto, e crespon
flon flon dra calamandra
flon flon dra felpa ancon

52
Se vorrei accattà damasco
in Scuaria ve n'andè
gh'an de stofe, e calamacco
dri Tabi, e dri taffettè
dro raso, dro velluo
dra moella, e morelon
flon flon mariev' vo' belle
flon flon mariev' vo' don

[p. 68 modifica]

53
I mersè vendan casette
e ancon guanti de fi
teie finne, e firoselle
con dra sea, e dro fi
dra frangia, e dro boxietto
dri pomelli, e dro gallon
flon flon e dri pissetti
flon flon dra guarnetion

54
Ghe son quelli dri frexetti
che vendan frexetti fin
dri spollin, dri razetti
banderette, e correzin
dre coronette, e dre scioì finte
dri rosaij con a paxion
flon flon e ve re infian
flon flon intro so cordon

55
Ghe son puoè dri atri mersè
che co'e scattoe fan camin
e ne crian pre a sittè
chi vuoè retin, chi vuoè cambrè fin
gh'an dro brigisi, e dra tocca
e dri velli d'Avignon
flon flon dra mossolinna
flon flon diggo dro bon

56
Ghe son quelli dri cavagni
che vendan dri pontaioè
dri scigoielli, e dre scattoe
dri agoggie, e agoggiaioè
vendan fi, e cavaggiea
con dre strinche, e dro cordon
flon flon pontaioè grossi
flon flon diè de latton

57
Sotto a ra loggia de Banchi

[p. 69 modifica]

e attorno li vexin
mersarie ne vendan tante
e de tutte e conditioin
galantaie de Venetia
de Parigi, e de Tolon
flon flon mariev' vo' belle
flon flon mariev' vo' don

58
Troverei puoè i guantè
che vendan dri guanti fin
dri vazetti de pomè
e dell'oeio de giasemin
pastette, e egua d'angei
e dell'egua de settron
flon flon zibetto, e mosco
flon flon dell'ambra ancon

59
Ghe son puoè i capellè
che vendan capelli fin
e dri nuoevi, e dri usè
e dri grandi, e dri piccenin
e se v'accattè un capello
ve ghe mettan o so cordon
flon flon e i suoe trinchetti
flon flon e un pomellon

60
Troverei i berettinè
che fan berette, e berettin
e ne fan de robbe usè
e ancon de panno fin
san fà unna todeschinna
unna lusianna, e un morrion
flon flon berette longhe
flon flon, e un beretton

[p. 70 modifica]

61
E ghe son i repezin
che vendan dre robbe assè
dre marsinne, dri cazoin
dre fadette, dri scosè
un bello ferriollo
unna camixa, un gippon
flon flon, un bello busto
flon flon, con un striggion

62
Ghe son puoè i banbaxè
che vendan dre casette
da teia da fà scosè
camisioere, e braghette
indianne, e bambaxinne
dro bambaxo, e dro cotton
flon flon vendan dri meizari
flon flon dre sente ancon

63
I agguè vendan stachette
con dre cricche, e dre mappe
dro fi ferro, e dre stanghette
con dre coffe, e dre sappe
dri cancari, e dri aggui
e con dro fì de latton
flon flon ballin, e balle
flon flon dro ciongio ancon

64
Ghe son puoè i pellizzè
che ne vendan dre pielle
d'ogni sorte d'animè
e de vorpe, e d'agnello
e vendan a chi ha freido
unna moffoa, ò un moforon
flon flon mariev' vo' belle
flon flon mariev' vo' don

65
I librè gh'han tanti libri
che se i voressi nominà

[p. 71 modifica]

besuoegnerè che fasse un libro
come è grosso ro messà
basta solo che ve digghe
che n'han d'ogni condition
flon flon lighè in cartinna
flon flon e con ro carton

66
Ghe son puoè i cartè
che ne vendan dre penne
dri libri reffiè
con dro pappiè da stamegna
de righe, e dri exempij
dra cartinna, e dro carton
flon flon e dra puetta
flon flon inciostro bon

67
Ghe son puoè i verrè
che vendan dre conchette
dri gotti, e dri orinè
dri fiaschi, e dri ampollette
dri tien, e dre pugnatte
un lavezzo, e un lavezzon
flon flon amoe, e doggi
flon flon mezette ancon

68
Ghe son puoè i archibuxiè
che ne fan dri carrobbin
dre schiopette ben montè
dri archibuxi, e dri foxin
dre pistolle, dre terzette
un moschetto, e un piston
flon flon c'o l'ha unna bocca
flon flon c'o pà un cannon

69
I tornuoi vendan canelli
toffanie, e caviggie
dri mortè, e dri pestelli
con dre boccie, e dre sbiggie

[p. 72 modifica]

dre spinne, e dri rocchetti
dri cuggiè, e cazze ancon
flon flon mill'atri imbroggi
flon flon de legno bon

70
E ghe son i lattonè
che ne fan dre lumeette
e ancon dre caderette
dri bronzin, dre lanternette
e san fà unna campanna
un campanin, un campanon
flon flon con ro battaggio
flon flon chi fa dindon

71
Se unna bella caderetta
ve vorressi fave fà
ò se no un scadaletto
ve n'andè da ro cadeà
e o ve farà una gratteinna
unna stagnera, un concon
flon flon unna braxiera
flon flon o un tannon

72
Ghe son puoè i ferrè
che ne fan dri martelli
dre cadenne, dre ferrè
dre tenaggie, dri scopelli
unna ciave, con a chiaveura
unna zappa, un piccon
flon flon unna marapicca
flon flon de ferro bon

73
Se vorrei corde accattà
n'andè da i cordanè
che dra canneva appaeggià
e ghe n'han in quantitè
ve faran dra peosetta

[p. 73 modifica]

terragninna, e spago bon
flon flon ch'o sarà ciù torto
flon flon che ro cordon

74
Se n'andè da ra Maddaenna
li ghe stà i chittarè
che stromenti d'ogni menna
lò san fà in veritè
ve faran unna bonna sittoa
unna chittara, ò un'arpon
flon flon un violin
flon flon con un zonzon

75
Da legnamme i mercanti
vendan squere, e cantè
dre toe fa quaranta
farchettinne, e toè
gh'haveran un bordonà
e con quarche tavolon
flon flon erboi, e antenne
flon flon quarche spigon

76
Sotteriva i bancharè
fan dre banche, e dri buffetti
guardarobbe, e forzè
carreghe, e scambelletti
ve faran un'armaietto
unna cascia, ò un cascion
flon flon banche da sala
flon flon de legno bon

77
Da ro Muoè ghe stà i bottè
quelli dre veire, con i taggiè
e ancon dri remorrè
che fa remme, chi boggioè
chi fa unna taggia, chi unna botte
chi un bossetto, chi un veon
flon flon chi un carrattello
flon flon chi un frascon

[p. 74 modifica]

78
E ghe son i siassiè
che ne vendan suxetti
e ancon dri rattaioè
dri siassi, e dri siassetti
gh'an o siasso de sea
con ro siasso schiavon
flon flon mariev' uo belle
flon flon mariev' uo don

79
Ghe son puoè i caeghè
cha fan scarpe, e scarpette
per e figgie e pre e maiè
per chi se re vuoè mette
fan dre scarpe a ra parrigginna
d'unna suoea con ro cordon
flon flon con i ponti gianchi
flon flon e pistagne ancon

80
Se un cuxioù taggia unna robba
liè o ne vuoè strascinà
questa l'è a prima cosa
c'o l'ha vosciuo imparà
ò pre riffe, ò pre raffe
o ne vuoè un scapparon
flon flon se ben sarreì lesti
flon flon ve fan mincion

81
Se vorrei accattà riccella
i fainotti a vendean
dra lombarda, e dra tosella
chi ne fa dro gianco pan
e ve a mandean a casa
pre a garzonna, ò pre un garzon
flon flon in t'un sacchetto
flon flon ò intr'un barrazon

82
Ghe son puoè i neggiè
che ne fan dre banderette

[p. 75 modifica]

cavalletti inzuccaè
succarini, fantinette
con dre cagabolinne
e ra niegia con ro cannon
flon flon dro confortin
flon flon c'o l'è bon bon

83
A primaveia apponto
ne sentì ro bezagnin
chi vende cose d'apponde
e ne cria a ra mattin
a chi vuoè fà bello a terrazza
e chi vuoè sciorì ro barcon
flon flon mi gh'ho de tutto
flon flon diggo da bon

84
E gh'ho dra gioxia
dro baico, e giasemin
dri giassinti, e dra gazzia
dri ganuoeffani schioppoin
ammò perfetto, e cornuo
dri pensieri, e dra pascion
flon flon ghe n'ho de Spagna
flon flon dra giana ancon

85
Gh'ho ro ganuefano, e a roesa
o rannoncolo, e o baraxetto
a peonnia, a tuberosa
o tollipan, e l'ambretta
l'annemolo, e o livio
a giemmelle, e o trombon
flon flon e un'arboretto
flon flon e de limon

86
Gh'ho dra persa, e dro miego
dro porsemoro, e romanin
dro baxaicò, e dra viesa
e dra rua pre i taggiarin

[p. 76 modifica]

gh'o dell'erba santa Maia
e dra menta, e dro crescion
flon flon dra radiccietta
flon flon leitughe ancon

87
E gh'ho dra vallaianna
de l'agretta, e dra varma
erba amara, e porselanna
dri chiguoemari, e dra sarnia
gh'ho dre zucche, e dre meizanne
e un'arboretto de settron
flon flon pre chi o vuoè apponde
flon flon l'è serto bon

88
Sentirei ancon passà
un chi cria a sta maniea
Panè Paneà
l'è chi unna bella paniea
un cavagnetto bello
con un bello carbon
flon flon unna bella chinna
flon flon da mette ro poppon

89
Ghe son puoè i garzoin
che ne vendan dri lunaij
Ciaravalli e relatioin
dre liste dro seminaio
dri lunaij in libretto
a lista dell'oration
flon flon unna bell'istoia
flon flon unna canzon

90
Ghe son puoè i spazzacammin
che non fan solo crià
famaruoè spazzacammin
a chi ro vuoè fà ben raschià
son brutti, e caffonenti
ciu neigri, che ro carbon

[p. 77 modifica]

flon flon puoeran o retreto
flon flon de Giaccuron

91
Sentì puoè pre e ciazze
che ne crian i strazzè
chi voe strazze, chioue[sic] strazzè
gotti rotti e orinè
a chi gh'ha dro veddro rotto
con dra scorza de settron
flon flon mariev' belle
flon flon mariev' vo' don

92
Sentì ancon pre ogni canto
ben crià o rumentà
che co a so zapetta a canto
a rumenta o va a sercà
e o porta a so spassoia
e ancon o so corbon
flon flon e ve ra levan
flon flon d'ogni canton

93
Chi vuoè brenno, i brennè
sentirei spesso crià
ma vorreian in veitè
dra fainna ben siassà
e se a man non resta gianca
dixan c'o non è bon
flon flon sercan dro brenno
flon flon fainna ancon

94
Sentì puoè i zavattin
che non fan solo crià
á ò sigaò, a ra mattin
á ò sigaò, a ro disnà
á ò sigaò, a chi ghe ro metto
á ò sigaò, diggo un taccon
flon flon á ò sigaò
flon flon l'è a so canzon

[p. 78 modifica]

95
Ro ciappuzzo ben spesso
sentirei ancon passà
s'unna puoela, ò un lavezzo
ve vorressi fà pessà
e o sentì c'ho cria
conza lavezzi calderon
flon flon chi gh'ha de rotto
se fasse a ro barcon

96
Da Montoeggio i carboniè
spessi giorni ancon ne ven
con i mù ben carreghè
de carbon con ro so fen
e ri sentì crià
chi s'accatta carbon
flon flon l'è chi de rovere
flon flon c'o l'è ben bon

97
Vuoi puoè ogni mattin
ve sentì addescià
che o vostro resveggin
l'è ro garzon dro fornà
chi cria testaelonne
son chi che fumman ancon
flon flon e fan ben fà
i figgioè a ro barcon

98
Ghe son puoè i Pentemin
che ne vegnan a ra sittè
a o venardì mattin
pre sercà a caritè
e pre vende i suoè bastoin
scorran ogni canton
flon flon mariev' vo' belle
flon flon mariev' vo' don

99
I sentirrei crià
chi s'accatta unna scaetta
unna bella canà
un'aspa, unna forchetta

[p. 79 modifica]

unna capponiea bella
un ghindao, un baston
flon flon ò scià se l'accatte
flon flon sciò mè patron

100
I sentì puoè sbraggiane
caccienene unna fetta
tanto da dezazunase
denene unna fregoglietta
bella signoa caa
demene solo un boccon
flon flon a ro Pentemin
flon flon aggiè compassion

101
Ma perr haoa voeggio lascià
tutti ri atri mestiè
o scopellin, o marmarà
l'indoroù, e ro stoppiè
ro schultò, e ro pittò
con quarch'atra proffession
flon flon vuoeggio cantà
flon flon dro bergoron

102
Chi se scortisse ste bergore
che son a ro barcon
ne den dì fra lò atre
nuoì non intremmo intra canzon
per che a nostra non è arte
ne mestiè, ne profession
flon flon mariev' vo' belle
flon flon mariev' vo' don

103
Ma tanto a vostra parte
ve tocca ancon a vuoì
cose l'è a vostr'arte
ve dirò de stè a sentì
a vostr'arte l'è questa
d'arrobà se puoei o patron
flon flon per regalane
flon flon o gallanton

[p. 80 modifica]

104
Piggiè scio Cappoà
sto fiaschetto de vin
che o son andeta a trà
a Quinto sta matin
e questo l'ho piggioù
da rescoso dro pattron
flon flon per regalà
flon flon voscià patron

105
Serte stacche portan sotta
che puoeran sacchi da minna
e puoè d'in otta in 'otta
se re impan de fainna
con quarche fiaschetto d'oerio
ò quarche fugasson
flon flon fan stà allegro
flon flon o gallanton

106
Ne van puoè pre ciazza Nuoeva
e comenza[n] accattà
e tutto quello che puoeran
lò sercan d'avanzà
in tanto quarche sodo
se mettan intro striggion
flon flon pre dà a daoetto
flon flon a o gallanton

107
Intra carne gh'avanza
sempre quarche dinà
per che in cangio de manza
dra vacca van accattà
e in cangio de vitiella
accattan dro scotton
flon flon e ingarbuggian
flon flon o so patron

108
E in tutto cos'accattan
l'ó[sic] g'han o povein

[p. 81 modifica]

e duoi dinè, ò unna da quattro
ò unna da oetto, ò un sodin
e fan ro so groppetto
da rescoso dro apattron
flon flon ma ro diavo
e o leccheà con un tizzon

109
Quando puoè van a casa
dixan a e suoe patronne
tutta a robba l'è cara
c'a l'è in man dre regatonne
ghe vendan mille fore
pre appannà ro piccion
flon flon e fà ingrascià
flon flon ro gallanton

110
E se a patronna cria
che n'è lesto ro disná
per che l'è l'avemaria
a n'è ancon vegnua d'accattà
a bergora presontuosa
a se fa come un biscion
flon flon e a ghe dixe
flon flon a so raxon

111
A gh'attroeva ra scusa lesta
con di che o formaggià
non gh'haveiva de sà pesta
e ch'o l'ha feta aspettà
e che puoè ro maxelà
o gh'ha deto dilation
flon flon per che o gh'haveiva
flon flon a fuga ancon

112
Ma za s'accosta l'hoa
d'andane a mangià
o pattron s'assetta a toa
per voreine disnà

[p. 82 modifica]

ma o puoè mangià de mormoe
con l'agro de limon
flon flon e chi n'è caosa
flon flon ro bergoron

113
E a ro sente crià
subbito liè l'investe
con di scià deia accattà
e legne che fuissan secche
pre che non fan ni sciamma
ne braxoa ne carbon
flon flon fan solo fumme
flon flon o sciò pattron

114
E se a patronna cria
pà che ra voeggian mangià
con dighe Vosignoia
m'ha piggioù a perseguità
voscià m'aggiuste o me conto
m'attroveò atro pattron
flon flon mandea via
flon flon ro bergoron

115
Mandea in mal'ora
deghe ri suoè dinè
e feghe un pò de poa
con quattro cannelè
fregheghe ben re spalle
con un pezzo de baston
flon flon mandea via
flon flon ro bergoron

116
Così queste fantinne
s'attroevan descordè
lontan da re cascinne
e ancon senza dinè
e per a so superbia
n'attroevan de patron
flon flon van per a famme
flon flon in barlugon

[p. 83 modifica]

117
L'è o piezo che ro galante
chi soleiva mangià
o gh'ha deto o cianto
per che o n'ha ciu un dinà
così o so galante
l'è hà[sic] despeation
flon flon, e l'appetitto
flon flon l'è o so pattron

118
Ma ben unna ressetta
aora ve voeggio dà
se ra bergora lesta
vorrei tegnira per ra cà
feghe assazzà o canello
quando ven l'occasion
flon flon e miè che n'aggian
flon flon ro gallanton

119
Compatime bergore care
se ho dito mà de vuoì
e per non arraggiave
andevene a dormì
ammortene ro lume
leveve da ro barcon
flon flon andevene in letto
flon flon sciu ro saccon

120
E vuoi atre signoette
che me seì stete a sentì
doman sareì marotte
se non ve ne andè a dormì
leveve re fadette
a camisa, e ro gippon
flon flon andevene in letto
flon flon diggo da bon

121
Bonna seia me ne vaggo
mi assì a reposà
che se a goa non me bagno
mi non posso ciù cantà
bonna seia belli e belle
che sei stete a ro barcon
flon flon ve a daggo a tutti
flon flon fin a ro bergoron