Bolle de savon/O Caffè Romma
←Dove va barca va Baciccia | Bolle de savon de O Caffè Romma |
Sûnetto elettorale→ |
che co-i veddri da sò Lanterna
Magica o me fa vedde tûtti i vëgi
amixi (ahi, quanti son i morti) do
Cäo Morando, quell’articolo
o m'ha misso o fêugo addosso:
con ste rimme te ringrazio:
malamente: comme posso.
Cäo Morando, quell’articolo
o m'ha faeto proprio ben;
o m'ha faeto in mëzo a-e nûvie
intravedde ûn pö de sën.
Me son visto torna zoveno
corrî dietro a ûnn-a lûçia,
lûmme, fêugo de ciaebella
che ciammavimo poexia.
Cöri e cöri, vanni e vanni
no l'ho mai posciûa acciappâ:
passa i meixi... passa i anni...
ahimemì! ch'a l'é scentâ.
Cöse importa? se a m'ha daeto
ûn momento de illûxion:
cöse importa? se pensando
quelli tempi vivo ancon;
e se veddo ancon quell'angolo
do Caffè do sciô Dagnin?
e se sento ancon e ciarle
faete a quelli tavolin?
Veddo e sento, e sto miracolo
ti o fae ti, Morando cäo,
ti o fae ti con quella penna
che a-e memoje a dà l'aväo.
Quanti amixi che fïavan
e tesceivan a sò teja!
quanti amixi che metteivan
a-o sò gosso remmi e veja!
remmo e veja e o vento in poppa
e a speransa pe polena...
ven a saeta chi n'accoppa
tûtt'assemme e... addio, Manena!
Ah, de quello Caffè Romma
che o n'é poi tanto lontan,
quante semmo ancon? ― Contemmose
in scë çinque dïe da man.
semmo pochi: - i ciù ûnn-a raffega
a-i ha zà mandae a Staggen....
....Ti co-a tò Lanterna magica
ti ne dixi; - ve sovven?....