Bolle de savon/Dove va barca va Baciccia
| ←I nostri Santi e i nostri Morti | Bolle de savon de Dove va barca va Baciccia |
O Caffè Romma→ |
Nè lûmmetti, nè fùrgai,
nè sciäti e spari e feste:
ûn fêugo a-o monte: Trento;
ûn fêugo a-o mâ: Trieste.
L'é incontro a questa lûxe
che anchêu i Baciccia van,
mentre o destin o cûxe
a teja pe-o doman.
Coscì, de nêutte, in mëzo
a-o bosco, fà cammin
o viandante ch'o vedde
lunxi brillâ ûn lûmmin.
Bravi, zoenotti! - a rovë
co-i venti a n'ha desdiccia;
bravi, zeneixi! - dove
va barca, va Baciccia.
Giûstamente sûpèrba
Zena a ve ciocca e moen:
remescian sotto l'èrba
i morti de Steggen.
L'é o chêu de tûtte e donne
comme ûnn-a bella niccia;
moae, sêu, moggê, galante
gh'àn drento o so Baciccia.
E a lampa, comme in gexa,
ognûnn-a aççeìza a ten….
Mominn-a, Caenn-a, Texa,
scialla! o l'é chì c'o ven.
Che furgai!... che lûmmetti!..
che baxi!... che sospii!...
Fïan torna i mae cocchetti,
e cantan torna i nii.
1916