Bolle de savon/I banchetti de Natale
| ←Panem nostrum... | Bolle de savon de I banchetti de Natale |
Primma de piggiâ seûnno→ |
| www.liberliber.it 2011 |
I.
Vëgio zeneize, mi veddo voentëa
chi sotto a-e feste, sti dö-trei banchetti,
quest'invexendo, questo pö de fëa,
sto bordello che fan ommi e gardetti.
No capiscio, ö confesso, a grande idea
(cöse vêu dî no aveì çerti speggetti!)
de quelli che con gran prosopopëa,
co-a cresta rossa, van comme galletti
sbraggiando seriamente che bezêugna
finila con çerti ûsi do passôu;
ch'o l'é ûn scandalo, ûn sgrêuxo, ûnn-a verghêugna:
che no l'é i tempi de messê l'Abbôu,
che Zena a no l'é Pentema o Tribêugna,
che a çittae e l'é a çittae, e no ûn mercôu.
Ebben, amixi cäi, con vostra paxe,
mì ogni anno aspëto questo ramaddan;
o me pâ, - l'é per questo ch'o me piaxe -
ûn diversivo a-o solito tran-tran.
Tûtto l'anno a çittae a l'é ûnn-a fornaxe
dove ognûn chêuxe o sò boccon de pan,
dove ognûn çerca, gode e se compiaxe
de fottive guägnandove de man.
Invece, de sti giorni, fae ûn pö mente:
se cangia naso e bocca, i gesti, a voxe;
a gente a pâ - so mi? tûtt'atra gente:
a vedde a chinn-a, e l'é ancon lunxi a croxe,
e tûtt'intorno cantâ paxe a sente,
e a piggia e a dà voentëa o dinâ da noxe.
Ma fra tûtti i banchetti de Natale
i ciù che ciamme gente, i ciù avvoxae
son da Paxo e rimpetto ä cattedrale,
dove se vende libbri vëgi e ûsae.
Gh'é de tûtto: volûmmi de morale,
vitte de santi, tomi scompagnae
de romansi, de storia natûrale,
vëgie droghe co-e pagine strassae:
c'ûnn-a spûssa de muffa e de relento
o Conchetta, Volter, a Filotea,
ûn pappê, ûnn-a gazzetta, ûn documento,
raccole, stampe, fêuggi, raffataggi....
e a pescâ drento a questa gran cädea
gh'ò visto scinn-a o depûtôu Macaggi. -