Bolle de savon/Cronaca Zeneize
| ←Dä bella Ninin | Bolle de savon de Cronaca Zeneize |
Pe-o monumento a Mameli→ |
| www.liberliber.it 2011 |
(X Dexembre 1847)
Che grandiosa missa in scena!
tûtto ûn popolo chi và
sciù, cantando: tûtta Zena
ch'a se mescia: - cöse a fà?...
cöse a dixe?... cöse a veû?...
Donne, vëgi, ommi, figgiêu,
ûnn-a lunga procescion,
con bandee, coccarde, mûxiche;
mille voxe e ûnn-a canson....
Che grandiosa missa in scena!
Tûtto Zena!
San Viçenso, o Mêu, a Madaenn-a,
San Teodoro, Prè, Portoja;
co-a Gioanetta e a Cicco e a Caenn-a
a scignöa de casa Doja
che a se scorda ûn pö o blason:
o l'é ûn bello preboggion
de marcheixi, de camalli,
de giacchê, marscinn-e, meizai,
de bordatti, ciûmme, scialli....
Tûtti sotto a ûnn-a bandëa
pe ûnn' Idea!
A ciömava, comme a zimma
sotto ä çenie do camin:
ma ûnn-a nêutte a-i monti in çimma
a l'é sciamma: - l'apennin,
ecco, o s'aççende do sò
fêugo - o l'é tûtto ûn falò.
Chi l'ha aççeizo l'é lontan
dä sò bella taera ligure,
schivôu, solo comme ûn can....
ma o remescio o vedde e o sente
da sò gente.
Sciù e sciù, cantando: - çento
anni primma, pe-a montâ
i besavi l'ardimento
celebravan da sasciâ....
Coscì torna a-o peì Martin,
coscì l'aegua a torna a-o moîn,
coscì o cäo do rûmescello
trêuva, doppo tanto, o popolo,
perchè o ten l'êuggio a-o pennello,
e o l' agguanta, a-o tempo bon
l'öcaxion.
Sciù e sciù: - che righinaggia!
ciù van, ciù monta a marëa:
o no l'é fêugo de paggia:
gh'é Mameli co-a bandëa
dell'Italia, e in sciö ciassâ
là d'Oeginn-a, in faccia a-o mâ,
o l'aççende co a parolla
ch'a l'ha d'ûn torrente l'impeto,
sempre ciù quella gran folla...
Sbraggian tûtti comme matti,
scinn-a i fratti.
Contan che a sentïlo a l'ëa
ûnn-a cösa da no dî:
con çerti eûggi... c'ûnn-a cëa!...
i cavelli paivan fî
de saea, - biondi comme o gran;
e o parlava co-o chêu in man.
Pä che cöre ûnn-a scintilla
ch'a dà a tûtti a scossa elettrica
quande o dixe de Balilla:
o l'é ûn sciato, ûn caeto, ûn crïo
tûtt'in gïo.
........................
Ma a tanti anni de distansa
queste raccole fan rïe:
ideale? - Stacca e pansa;
lasciâ andâ çerte lûçie,
no avei scrupoli, no temme
ninte, o a tempo sciâ co-e remme;
ëse giano, verde, rosso,
comme torna mëgio, - a-o popolo
mostrâ a lûnn-a drento a-o posso...
Chi sà, ben fâ o ciarlattan
va lontan. -
1912.