Bolle de savon/A rogna a l'é in te crave

Bolle de savon de Carlo Malinverni
A rogna a l'é in te crave
[p. 186 modifica]
A rogna a l'é in te crave

«A rogna a l'é in te crave»... moddo de dî zeneize;
c'o segge giûsto ö semmo ben spesso a nostre speize:

ma se ghe dà do naso d'ogni giorno, d'ogni öa,
pe piggiâlo poi sempre (scusaeme) sotto a cöa.

Quande o momento o capita, e ven a balla a-o botto,
invece de stâ all'occi, d'andâghe a tempo sotto,

e fâ ûnn a gran volata,... ûn sbraggia, l'ätro o crïa
i torti se ballezzan, - e se perde a partìa.

Ognûn stando a sò posto, lì attento cö brassallo,
se sae posciûo fâ celo... ninte, s'é faeto fallo.

Quante votte (e chì tûtti poemmo dî: - me sovven...)
l'é finïo mâ ûnn'impreisa c'a poeiva finî ben,

perchè i äti papavei - pe no dî e grosse rave,
non ëan d'accordo, e insomma a rogna a l'ëa in te crave! -

In politica poi.... no ne ciarlemmo manco:
se Togno o dixe neigro, Baciccia o dixe gianco;

e son Togno e Baciccia da maexima gexetta
e a-o stesso santo aççendan a maexima lampetta.

[p. 187 modifica]

Cöse vêu dî che quande l'é o tempo bon, - pe l'ordio -
- criboli! no gh'è moddo de mettili d' accordio?

e nisciûn ha o bon senso de dî: - noî ticcossemmo,
e i ätri intanto, fùcai, ne vêugan in sciö remmo?

e dî: no seì, bonaegie, che andando de sto passo,
se a rogna a l'é in te crave no se conclûdde ûn c....?