Bolle de savon/A gran voxe de Zena
| ←Fanfaronata | Bolle de savon de A gran voxe de Zena |
Zimme→ |
Avieì visto e notôu che all'öcaxion
se dà che Zena a säte sciú d'asbrïo:
Mameli, ûn giorno, o dixe ûnn-a canson,
Balilla, ûn ätro giorno, o bêutta ûn crïo:
ûnn-a zimma; ma cheita a tempo e lêugo:
e Zena, comme a povie, a piggia fêugo.
Son duî anni... pä vëi! - fra o tira e molla,
gh'ëa o rischio de poeì fâ ûnn-a brûtta fin:
ma l'ûrlo chi é sciortio da quella folla,
da quella folla, a Quarto, ûnn-a mattin
de mazzo, là, in sce quello nostro schêuggio,
e cöse o l'ha cangiôu 'n t'ûn batti d'êuggio.
O zeneize o no vive de luçie:
mercante scinn-a ä punta di stivae,
o parla de caratti e de stallïe,
e o l'ammûggia de coffe de dinae:
a vitta a l'é, chì in riva do Bezagno,
fondego e magazzin, traffego e scagno.
Ma se ven giorno che ghe segge in ballo
l'onô d'Italia.... oh! allöa no se mincionn-a:
sensâ da nöezi, granattin, camallo,
bambaxâ, caravana, regattonn-a,
barcajêu, repessin, conte, marcheize,
sente o sangue boggî: - sangue zeneize!
S'é visto sta domenega passâ
ûnn-a cösa che a dîla a no pä vëa!
ûnn-a pinn-a, ûn torrente, ûn sciûmme, ûn mâ...
se pêu dî: - di zeneixi chi no gh'ëa? -
bocche che crian, êuggi c'han coae de cianze,
e ûn fô de maoxo quando a-i schêuggi o franze.
L'é bello vedde o çê quande o l'é sën,
l'é bello vedde ûn prôu quande o l'é scioîo,
l'é bello vedde duî che se vêuan ben
fä stradda insemme e preparâse o nïo:
ma l'é ciù bello ûn popolo chi crïe:
no voemmo ciù tedeschi in casa e spïe.
Poi, da Mazzin, a-i pê do monumento,
c'o saeiva, comme dî l'artâ maggiô,
o popolo o l'ha faeto o sò zûamento,
pe-a guaera, pe-a vittoria, pe l'onô:
e s'é sentïo; da mezo a quella scena,
äta levâse a gran voxe de Zena.
1918