Çittara zeneize/Rimme çivî/Possi tu luxî tanto che ti scciatti
| ←Minetta cara, no ghe son ciù mezo | Çittara zeneize - Rimme çivî de Possi tu luxî tanto che ti scciatti |
Mæ cœu, quanto ciù miro ro retræto→ |
| Zena, Franchello, 1745 notte do Prien |
XXXI.
Possi tu luxî tanto che ti scciatti,
Luña desgraçiâ, luña cornua!
Che, per fâte ciù cæra e ciù oggiua,
Me crao che tutta in fin ti te sguarratti.
In tò bon’ora, quando ti scorratti
Chì e lì pe ri boschi bella nua,
Chi te ven a çercâ cœutta ni crua,
Se ti væ in gattixon comme ri gatti?
Chi ven a nastuççâ cose ti faççi?
Se con ro tò ciù caro ti te govi?
Se ti te træ bon tempo, e se ti sguaççi?
Luña troppo importuña, ti m’incióvi
Tutto ro ben dro Mondo, ti m’ammaççi.
Zœumoǽ fatte ciù neigra che ri crovi!