Ra cittara zeneize 1636/Un mirion de Care intra Marinna
| ←torna a l'èndexo | Ra cittara zeneize de Amoî Mainæschi |
Za ro Cé comensava à fase gianco→ |
| Zena, Gioxeppe Pavon, 1636 In corscivo e ligatue. Gh'amanca i acenti aguççi. |
Un mirion de Care intra Marinna
Chì, e là tutta nuoette hò scorrattou
No gh'è parmo de Ma c'haggie schivou
Con questo scattiggion de fregatinna.
Oura con Lensamorta, e con trezinna
Ri scoeggi à terra à terra hò costezou;
Oura tanto allama me son tirou,
C'hò temuo dra me ultima rovinna.
Maxinna, se se visse ri destrassi
De questo corpo mizero, e tapin
Ne vegniræ pietæ fin à ri sassi.
Mà che me va da puoe tenti strassin,
Se tì, per chi m'ammasso, tì te pasci,
Chiù che de pan dre carne de Ballin?