Ra cittara zeneize 1636/Sciù ro Carro d'arinto

by Gian Giacomo Cavallo

←torna a l'èndexo

Ra cittara zeneize de Gian Giacomo Cavallo Amoî boscæsci

A ra Crua, chi l'odiva→

Zena, Gioxeppe Pavon, 1636
In corscivo e ligatue.

AMUOI BOSCARECCI
Canzon Quarta.

1.
Sciù ro Carro d'arinto
Sensa macchia de nuvera nissunna
Compariva ra Lunna,
Re Stelle con regatta de sprenduoí
Luxivan chiære come tenti Suoí,
Quando à ra Crua chi l'hà sempre d'attorno
A fá dra noette giorno
In cangio de dormí
Così ro bon Pastò se fé sentí.

2.
Zà ra Lunna tramonta;
Re Stelle chi pareivan poco avanti
Puinte de diamanti,
Oura che se dan tutte in ammortá
Poæran giusto mocchetti da un diná.
Zà ro Cé mostra con cangiá coró
Che l'è tosto l'Arbó
Bella levate sciué,
Ogni cosa t'aspeta, e no puoé chiué

3.
Ro Grilletto dro proù
Perche ogni sció se desce, e te regalle
Descia tutta ra Valle
L'Oretta perche ti odi ch'à t'invia
Resveggia chì e lì l'ære addormia
Ro Bosco tutto à ro scrollá dre ramme
Pá che à puinto te chiamme
A gustá ri oxellin
Bella in questa bellissima mattin.

4.
Così con canti, e preghi
L'ære addociva verso ra sò Cara
Ro Pastó per desciará
Con trammághe per veira questo inganno
Se ben rà nuoette era ancon lunga un anno
Ma vistose burlou da ra speransa
Stæto un pesso in baransa
O partì pin de chienti
Per no stá li chiù à pascese de venti.

5.
Canson ra Bella dorme
Desciara non è raxon
Se fin chi ti gh’è fæto ra canson.